Leven vrunde. Alze juwe erbaren oldermanne latest weren to der dachvard to Copenhaven geholden unde gheven den radessendeboden der stede der hense daer vorgaddert to kennende, wo etlike van den steden zegelden to Orkeney unde in Hidland jegen des kopmans privilegia unde vryeheit, dat deme kopmanne groten schaden dede, dar up de radessendeboden do ere ruggetoch nemen in ere rade to bringende, dar van den steden antworde to seggende to der negesten dachvard etc.: dar up wille juwe erbarcheit weten, dat de radessendeboden hir vorgaddert uppe desse tiid hebben ere antworde ingebracht unde hebben geslotten,¹ dat ene islike stad der hense scal kundigen eren borgeren unde kopmannen, dat nemant schal zegelen to Orkeney efte to Hidlande efte to Vere, unde ok nenerleye lage maken efte hebben anderswor, wenne to Nortbergen, Anslo unde to Tunsberge, dar de vryeheit unde gelege oldinges weset hebben unde sint; weret zake, dat yenich schipher efte kopman dat breke, dat schip unde gud schal vorvallen der stad, dar dat ersten tosocht edder kumpt; unde dat schal de stad strengeliken richten; unde de schipher unde de kopman schal na deme dage nicht mer werdich wesen der vryeheyt des kopmannes der Dutschen hense. Hir umme, leven vrunde, so bevelen de stede juw unde dem kopmanne van Anslo unde bidden dat vorttosettende unde to bewarende also, efte jennich schipher efte copman wolde desse vorboden reyse zegelen edder anderleye [gelege] hedde, wen dar vore van screven ys, dat gy dat vorscriven unde kundigen den steden, da[r] dat gud ut efte yn geschepet wert, ok anderen hovetsteden der Dudeschen hense, up dat id nicht ungerichtet en blyve.