Item int jaer 141[6]¹ up unser leyven vrouwen daghe assompcionis waert by den heren radessendeboden up de tijt to Lobeke vergaddert ter dachvard geordiniert dusdanes poentes, dat se dem coepmanne in wysen hijrna van worden to worden overscreven, dat sick elk vor schaden mochte wachten: Vortmer² so helft de coepman van der Duetschen Henze in Norwegen liggende vele vor den steden geclaget, over dat etlike schipheren onde coeplode soeken unde zeghelen met copenschap to vorboden zegelacien, de ock yegen des coepmans privilegien zijn, unde ock dat etlike legher holden, daer nyn liegend des coepmans wesen scholde. Welke stucke dem menen coepmanne to groten vorvange zijnt, alse de coepman vorseid den steden to Copenhavene lesten vergaddert³ uterliken to kennene geven; welke stede eren rucgetoch do nemen, met eren raeden to sprekende, der se antworde wedderbrocht hebben up deese dachvard. Unde id ys also van uns, daer mede by geweset zijn radessendeboden der stede in Prussen mede vulbordende, besloten, eynsgedregen unde ordiniert des, dat eyn islick stad der Henze kundigen schal eren borgeren unde coepmannen, dat nymend schal seghelen to Hidlande edder Orkeney edder to Veroo, unde ock nynerleye gelege maken edder hebben in Norwegen anderswoer, wen to Nortbergen, Anslo unde Tunsberge, dar de vryheyde unde gelege van oldinges gewesen hebben unde zijnt. Wert dat yenich coepman edder schiphere dat breke, dat schip unde gued schal vorvallen der stad, dar dat erst tosocht edder kompt; unde dat schal de stad⁴ strengeliken richten. Unde de schiphere edder de coepman schal na dem daghe nicht meer werdich wesen der vriheyd des coepmans der Duetschen Henze. Hijrumme etc.⁵