...

85. Darna¹ sint de Bergerfarer upgelaten. De hebben clachte vorgegeven von wegen des copmannes to Berghen in Norwegen residerende, int erste, dat jegen de recesse sy Hithland unde andere eylande durch ytliche coplude uth den steden von der hanze besocht; sollen geholden werden, wente de rodscher uth Hitlande gehalet werd mit deme Bergerfissche² gemenget unde also vor Bergerfisch in bedrechnisse der lude gekofft, gegulden unde betalet. Item wo dat itliche jare langk geleden de copman to Bergghen eynen genomet Olaff Nyggelsz vorslagen, welkere slachtinge en mergklichen to beterende hadde gekostet; umme denne sulken schaden derwegen gedan to wedderhalende, uppt schot, dat de copman gevet, beswaringe durch den gemenen copman were gesehen, so dat id dubbelt werd gegeven; daran de von Deventer, Swolle unde Campen ungehorsam weren; begerende, de to underrichtende, so dat se ere schot gelick anderen copluden geven mochten. Ok geven se vore von eyn schip, darinne gewest were 1 packe vissches, durch de Engelsschen 2 jare geleden genomen.

86. De Bergervarer sint affgewyset, unde de sendeboden hebben gesloten, dat de stede dat schot eyndrechtliken schollen unnd willen geven.

87. Is³ forder geslaten, dat men Hytlande unde andere eylande nicht mer schall besoken; weret dat jemand dar entjegen dede, de schal vorlustich wesen der privilegie der hanze unde nicht mer geneten unde in den steden von der hanze nicht mer wanen.⁴

88. Is forder geslotenn, dat men uppe de vorgegeven artikele fordermer schal radslagen unde mit guder vorsenicheyd darto gedengken.

...

152. Item⁵ nemand sal de eylande besoken by vorlust der hanse uthgenomen Island, de de fromde natien ok vorsoken.

153. Item de Bergerfarer sollen ok nicht menghen Hithlander vysch mangkt den Bergerfisch, schollen ok mit ernste darvor wesen, dat de Hithlander visch moge gevlaket werden unnd nicht runt⁶ vor rothscher vorkofft.

154. Desses hebben de⁷ Bergerfarer begeret eynen segelden breff, de en vorlovet ysz to gevende.⁸

...