Desse nabescreuen gebreke vnde schade belangend den copman to Berghenn jn Norwegenn vorkerende.

Jnterste dat de van Bremenn vnde Hamboreg vorsokenn de oylande alze Hitlande Veroy vnde Orkenoy bouen de Henzestede recess vnde belenynge jungest to Bremen belenet vnde vorseghelth dem kunthor to Bergen to mercklikenn affdraghe vnde schaden.

Jtem de schipperenn so van Rostock Wysmar vnde Lubeke na Bergenn affsegelenn plegenn vor velen yaren, sick frachten laten to Lubeke by den frachthernn, de des nichtt en deden, dar van plach

de copman broke to nemen vnde doch itzunt szo nycht geholden werth.

Jtem de Hollander scholen to Bergenn in twen garden stan vnde allem by stucken vnde nycht by elen noch klener wycht vorkopenn, dat van dem heren koninge vorsegelt is, vnde doch nycht geholden wert.

Jtem enn schip bleff vnder der Mekelenborsschen szyden, dat Pawel Lange plach to forende myt vissche laden, dat vordrunckene wolk warth geblotet vnde borouet vnde de ffische vpp Swane gefort, vnde ock noch vmbetalth.

Jtem alze hertogen Magnus seliger vor Wernemunde lach, legen dri Berger schepe vp der Weernow dar vth denne syne gnade vpp iiij marc lub. vngeferlich vitalie leth nemen, vpp gelofflike betalinge, dem den also nycht gheschen is.

Jtem furder begert de copman dat ersam radessendebaden vnde stede ene an greue Etzarde willen vorscryuen vnde ene van schippere Vresen wegen to like vnde rechte vor se to vorbedende wente schege dar yemant auerfall edder schade en bouen will de copman dar jnne vngholden wesen.

Jtem wo sick de copman holden schall offt id myt dem heren koninghe vnde steden vthgynge, dar doch de copman priuilegie vp hefft, enn jar dar na alletyd veilich to zegelenn.

Jtem wo sick de copman by den guderen holden schall to Hamb zynde de den tollen scholen vorfarenn hebbenn.