Allen vnde enem jüwelcken beszundernn watterleye werdicheyde states edder weszendes dhe syn dar diissze vnsze apene breff vorkameth vnde ertoget warth dhon wij Burgermestere vnde Radtmanne der Stadt Hamborch negest irbedinge vnszes fruntliken denstes vnde grütes Szo sick dath nach enes juwelcken stathe geboret. witlich vnde apembar betugende vnde bekennende jn vnde myth dusszem suluen vnszem vorszeghelden breue. wn dath vor vns erschenenn syn dhe vorsichtigen Schippernn Hinrick Horneman vnde Hinrich vaget vnze borgere vnde hebben myth vthgestreckeden armen vpgerichteden vyngernn stauedes edes lyffliken tho den Hilghen szwernde getuget certificeret vnde wargemaket. dath am daghe Petri vnde Pauli apostolorum am neghest verganghen Jare duszent vyffhundert vnde Twyntigesten vppe dem aldynck jn Jszlandt weren tho szamende erschenen vnde by eyn geweszen dhe Erbarn Hans Eggerzen eyns vnde Tyle Petersszen ander deylls vnde dhe vorbenom beyden parthe durch myddell vnde frundlike vorhandelinge vorgemelter Hinrick Hornemans vnde Hinrick vageth dar Jegenwardich mede auer vnde anne synde. alze gewillekorde schedeszfrunde synt wurden malckander tho enem gantzen klaren ende fruntliken gescheden vnde vordragen jn nabescren wysze Szo dat vorbenom(de) Hans Eggerszen dhosuluest lauede vnde thoszede tho gheuende vnde tho vornogende gedacht Tylen Peterszen Twe vnde negentich golden gulden, dar vor dhe gnante Tyle Petersszen hefft weddervmme sick vorsecht gelauet vnde vorwillekoret by synen besten eren unde trüwen dath he wollde myth dem flitigesten dar vor weszen vorhandelen vnde vorschaffen dat Are Andresszen scholde alle vnde Jszlike gudere alze he vth synem Hetende vnde beuele Hansze Eggerszen Hedde entfrommedet vnde genamen gedacht Hansze wedder auerantwurden behanden vnde volghen laten dar mede scholden alle gebreke schelinge erringe vnde twysticheyde szo wente her twüsschen gnan(ten) Hansze Eggerszen vnde Tyle Petersszen weeszen gewest vnde sick hebben ieholden gantzs vnde alle vordragen gesleten entlich gescheydenn vnde bygelecht weszen szodans allenthaluen vast vnde sunder alle geuerde woll tho Holdende Hedden vorscreuenn parthe gelaueth vnde sick malckander eyne Handtastinge gedann vnde wente denne dhe vorbenom(de) beyden Schippernn tugen duth wo vormyddellst eren lyffliken geszworen eden vor vns apentlick vthgespraken vnde getuget Hebben wy vpp anszokent vorgedacht Hans Eggersszen betrachtet dat dhe rede vnde billicheyt esschen wanner dat inen des ersocht vasth tuchnyssze der warheytt tho gheuende. Szo vorszekern wy enem juwelcken dat enszodans bauenscreuen vor vns geschen is Hebben des tho orkunde vnszer Stadt secret witliken dhon Hanghen benedden ahn dusszen breff. Geschen vnde gegeuen nha Christi vnszes Hernn gebordt duszent vyffhundert dar nha jm eyn vntetwyntigesten Jare am voffteynden daghe des Mantes Februarij.