Vnnsze ganswillige vnd vnuerdratene denste thouoeren, Erbarenn vorsichtigenn wolwyszenn heren, beszundergunstigen gudenn frundhe, Juwer Er: wisz. breff ahn unns¹ sambt jnnenerlyneden Copien des Breues ko: w: to dennemergken etc. vnses gnedigstenn herren, ahn ko: mt tho Engelant etc. ock vnszen gnedigsten herren vnnd der hendele vnnd auescheide mith ohrer durchluchticheit oratore tho Segeberghe in bewustenn Islandescken szakenn genamen, syn vnns den xxviij dach aprilis togekhamenn, dhe wy ohres Jnholdes nha verleszynge woll hebben vernhamen, Vnnd wowoll, vnns noch desuluen dach, alsze Juwer Er: wisz: schriffte hingekhamenn, ethlike harde worde der szaken haluen boyegeden, Szo willen Wy vnns dennoch verhapenn, dath dath heteste daruan, affgelopen vnnd verby sy, wo nicht dhe doethlike affgangk hochberumpter ko: mt tho dennemergken etc. daruan men hir seggen will, ethwes daraff wedderumm (dath godt de almechtige gnedichlick affkere) erregenn edder erwegkenn werdt etc. Juwe Er: wisz: weten sick auer ahne twiffell vth munthliker weruinge vnszer Secretarienn darbeneuen ock vnszem schriuende derwegenn, tho mermhalenn, an desuluen gelangeth,² vnd susts vth allen vmmestendicheit ghestalt, vnnd gelegenheit der hendele, toer Jnrenn, dath nicht weynich ahn dher szakenn gelegenn geweszenn, dan dhat dhe allenn moegeligenn flyth Sunderunghe vnnd arbeit billikenn geeyget hefft, Szo hebben wy denne ock hirjnne nicht alleyne alle gebuerlike sorchfoldicheit vnnd furderunge gerne gehatt vnnd bowyszeth Sundern ock Lxxj pundt twe schill. vnnd vj d. sterlinges derwegenn vpp dath der juwen vnd ohrer gudere arresterunge vnnd ander vngefugh Jegen Juwer Er: wisz: vnnd des Er: rades tho Bremen gemeyne Stede (alsze villichte susts woll hedde vorgenhamen wordenn) nableue, verdhaen vnnd vthgegeuenn, dewyle nu sulliche bekostunge, JuAven Er: wisz: den Er: van Bremen vnnd den ohren thom besten gescheen, ock durch dhe Juwen vnnd ethlike Bremere dhe dusse vnluste in Jszlande angerichtedt is verorszaketh wordenn, Szo will eth sick Jummer yo nicht geboren, dath wy, dhe darto keyne orszake gegeuen, edder vnnsze gemeyne beste dath susts ahn vermoege gans gerynge is, allsulliche vnkost dragenn scholdenn, Vnnd willen vnns derhaluen tho Juwen Er: wisz: gentzlick versheen vnnd vertroestenn, dhe werdenn vnns nha betrachtunge vnszer vnnd der szakenn gelegenheit, dhe vnkost dhe wy dherwegenn gedhaen, nicht latenn dragenn Vnnd biddenn ock desuluen gar frunthlick vnnd vpt aller flytichste, de willen de gelegenheit hiraff woll behertigenn, vnnd vnns wath wy van Juwen Er: wisz: ahn botalynge bauengenoemeden vthgelechter summen verhapenn vnnd gewartenn schollenn, by touelliger gewisser boedeschopp gunsíichlick wedderumm vermeldenn, Worann wy Juwen Er: wisz: gudhenn willenn, frunthlike wilfharunge, vnnd angenemene denste de densuluen vnnd ohrer gemeynen Stadt tho gedieg vnnd wolfarth gereychenn muchten wedderumm ertoegen vnnd bowyszenn koennen, darahnn willen wy vnszes vermoegens alletydt, will godt (dheme wy Juwe Er: wisz hirmith bouelen) gerne gudtwillich vnnd vnuerdratenn gespoereth werden, Schreuen tho London in Engelandth am xx daghe des Maenthes Maij Anno etc. xxxiij.

Olderman vnnd gemeyne Copman dudeschen anze tho London Jn Engelant residerende.