Erstlich hefft Otte Tyrsßen de ffagett van wegen k. m. dat eyelanth Wespene unß aver ghedregen mith aller up kunfft dorch Jochim Wullenwever vorhandeltt na lude der vorschryvinghe.

Anno 47 erstlich dat lanth mith enem schepe beßocht up grote unkost unde geltspildinghe, alße dat schip na Johanni¹ dar quam inth lanth do waß alle kopenschop ghescheenn, dat der wegen unße gudt unvorkofft muste dar blyven.

Tho anderem hadde deß ffagedes boffell helber alle lanth ansick ghenamen, unde denn Engelschen vorkofft de wy doch na vormoge der vorschryvinghe ßelden entffangen unde up gheborett hebben.

Thom drudden hebbe wy nichte weynyger vor dat erste jar dat gelt, ßo wy unß vorschreven hadden, entrichtett unde betalett dorch Christian Elskelßen to Kopenhagen.

Tho fferdenn hebbe wy dat volgende jar grote unkost gedan alße anno 48 dat schip mith guderen gheladen unde up Wespene ßegelen laten, umme dat gudt ßo dat vergangen jar dar ghebleven unde de lanth schulde na lude der vorschryvinghe fforderen unth in manen.

Tho voftenn do dat schip van Hamborch tho ßegell waß, ßande unß Otte Tyesssen enen breff, dar innen he ßick vornemen ledt, he wolde unß denn vordrach unde de vorschryvinghe nicht holden, do wy grote geltspyldinghe und undrechlyke schaden ghereden weren.

Thom ßostenn hadde de ffagett sinen deneren unde boffell hebberen gheschreven unde boffalen dat ße unße guder ßo wy dar anno 47 ghelaten, ßolden nemen unde to deß ffagedes beste werden, dar inne ße nycht ßunich unde alles wech ghenamen unde quith ghemakett.

Item thom ßovenden hefft Otte Tyessen in vorleden tydenn unß guder aff kopen laten na lude der ghegeven hantschryfft is XIIc vysckes dar wy ock nycht mogen van betalett werden baven recht unde alle byllycheitt.

Thom achten hefft unße kopman, Laeß Mulen denn ffagett angelangett unde bogertt, de wyle onen unße guder ghenamen, ßo anno 47 dar ghebleven, muchte onen doch ein bowyß geven, wor umme ßodanß ghescheen, do hadden onen Laeß Mule eine schryfft beramett, de ßolde he underschryven ßo wolde he om einen bowyß geven, der weghenn is de tuchenisse gheffordertt unde beßwaren.

Thom negenden hefft unße kopman bogertt de wyle he om sin gudt ghenamen unde noch sulckene schryfft vor ghestellett, he ßolde doch ein recht up deß landeß wyße gaen laten, he wolde tho recht vor dem gantzen lande anthworden, unde dar by gherichtett ßin, offte he recht offte unrecht gehandelt hadde, dat hefft om Laeß Mule alße ein mothwyllyger gheweyerth.

Item thom teinden is Hanß Wegener unße kopman sampt sinen knechte in der nacht do unße schip van dar waß van ßinen bedde ghenamen unde ßo ffricklich in Engelanth van unßem gude, ghefforett, dorch Raff Dun, de ßulve is dar tho rechte fordertt ßo with dat he sampt XII mannen tho rechte gheßweren hefft, dat Loeß Mule de ffagett omm sodanß boffalenn unde ghebaden hadde tho doende.

Thom elfften hefft unß de ffagett dat vergangen jar noch nemen latenn van unßen ut staenden schulden II 1/2 last vysckeß dar wy wysße kunstschop vann hebben, weß deß ffals mer ghescheen is, wirtt sick hir namals boffindenn.

Item up duth vor gheschreven ßy wy angelangett ßo wy schuldich weren 7 punt sterling dat punth 4 daler wor wy ock betalett, ßo in ghericht tho Hamborch licht by her Gertt Nyebur.

Item alle vorschreven artikell tho gelde gherekentt ßo unß tho schaden unde nadell gheraden is tho gelde ßind 730 daler, aver dem vysck ßo unß datt vorganghen jar ghenamen is nomlich II 1/2 last vyskes.