Vnsernn freuntlichenn gruss zuuornn.

Erbaren vnnd weisenn hernn. besondernn gunstigenn freunde.

Welcher gestalt sich etliche vnsere Burgere auff Jsslandt hantirende supplicerende ann vnss beclagen. werdenn Ewer Erb. W. auss jnligender jhrer Supplication befindenn.¹ Vnnd dieweil sich dann Ewer Erb. W. wol zuerjnnernn. das wir vnss jehers gegenn derselbenn Burgere nicht allein mit bestellung des schepes folcks. sonder[n] auch ausstattung allerley schepes notturfft vnnd profiand. welchs wir doch jnn diesenn theurenn zeittenn auss vnser Stadt schwerlich entbernn konenn. nachbarlich verhalttenn. vnnd solche weigerung so denn vnsernn jtzo vber zuuorsicht vonn Ewer Erb. W. begegnet. bey vnss nich gespurt noch befunden worden jst. Derwegenn begernn wir freuntlich Ewer Erb. W. wollenn sich gegenn die vnsernn mit gleicher nachtparlicher Correspondentz vnnd furderung ertzeigen. vnnd befindenn lassenn. vnnd denn vnsernn jn solchen pilligen suchenn guthwillig erscheinenn. Wie sie denn jhrenn jnn andernn vnnd gleichen fellen vonn vnss widerumb zugeschehenn gern nehmen wolltenn, Vnnd wiewol wir darann nicht zweifelnn gewarttenn dennoch wes wir vnss des zuuorsehens ein zuuorlessig anthwurt. Vnnd seind Ewer Erb. W. widerumb freuntlichenn willenn zuertzeigenn gneigt.

Datum vnder vnsern Stadt Signet Sonabents nach Reminiscere Anno. Ivij.

Burgermeistere vnnd Radt der Stadt Lubeck.