Erbarnn. Hochgelartenn. unnd Wolwise grothgunstige Hernn. Negest erbedinge unser underdenigenn. unnd willigenn Dineste. konenn I. Erb. W. wy underdeniglich nicht verholdenn. dat wy eynn Schip up Isslant na Schwefell tho segelenn. thom forderligsten werdenn affertigenn. unnd tho der behueff etlicke Bosslude bynnen Hamborch upt sulve unnsere Schip gehuret, unnd anghenamen hebbenn. Unnd alse nu eynem Erbarnn Rade sollichs bygekamen hebbenn se gemeltenn unnsernn Bossluden by vorlust der Stadt waninge. unnd penen hundert daler inhibiert. unnd vorbott gedarnn. sick unnsers Schepes. unnd segelationn thobegeuenn. unnd enthaltenn. unnd dervyle dann vele der zeefarenden. unnd Bossludenn bynnen Hamborch alhir vann den Schippernn. up Franckrick unnd sunstz mehr andernn ordenn thosegelenn. gehuret. unnd anghenamen. denen doch ghar kein vorbott beschehenn. So befrombdt unns sollichs nicht weinig. und yst unns gantz beschwerlich. dat wy mehr dan andere Coplude. unnd Schipper up desse fhart na Isslandt sollenn vorhindert werdenn.

Derhaluenn erfordert unnser disfalls notturfft. sollichs I. Erb. W. underdenig anthotogenn. mith flitiger Bitt I. Erb. W. wollenn unns so gunstich vorschinenn. unnd unnbeschwert synn. an denn Erbarnn Radt tho Hamborch thoschriuenn. unnd fruntlich begernn. densuluenn Bossludenn unserm Schepe tho denenn. (wyle desuluenn der segelationn up. Isslandt kundiger dann andere) moge verstedet. unnd gegonnet werden. Ock in sunderlicher betrachtinge. dath sick I. Erb. W. kegenn einen Erbarn Rath tho Hamborch. mit uthstadinge allerleie notturfft, so up Isslandt diennstlich. an victallie. solcke. unnd sunstz nabmlich. unnd fruntlich ertzeigenn. Dan wo de sollichs vann den Erbarnn von Hamborch. bauenn alle gude naturliche thovorsicht. nicht thoerlangende were musten wy es dar henn stellenn. und dar by berowenn latenn. und uns mit andernn Bossludenn umb stehenn. hurenn unnd behelpenn. Twiuelenn averst nicht. wy werdenn I. Erb. W. gunstige forderung desfals by deme Erb. Rade erspriesslich geneten. unnd sindt es umb desuluenn I. E. W. unnsers vermogens thovordenen gantzwillich.

I. Erb. W.

gehorsame burgere

Gerdt Ruther
Iorgen Koninck
Cordt Kroene
vor sick. unnd ihren mithredernn vor Norden up Isslandt.