An die von Hamburg. Belangendt das schiff. So mit Schweuel aus Jslanndt vff die Elbe gebracht. Friderichsburg den letzten Januarij.

Anno etc. 63.

Friderich etc.

AIs wir von euch kurtz uerweilter Zeit. vff euer vnterteinigst antzeig. vnd begerrten bericht. wes Jr euch als die gehorsumen mit dem schiff. so mit schweuel auss unserm landt Jslandt vff die Elbe gebracht zu uerhalten. etc. zu gnedigster dancknemen Antwort begert. dasselbig biss auff fernern vnnsern Beuhel vnd bescheidt antzuhalten, vnd nichts darauss von Abhanden kommen zu lassen. das alss geschehen zu sein, wir nicht zweifeln wollen.

Damit nhun der schiffer an seiner narung nicht verkurtzt vnnd sein schiff nichts desto weiniger mitler weill. biss wir vnns dess Eingeladenen guts gentzlich entschliessen jegen dass vorher siegel reit zumachen vnnd zugeprauchen - Begern wir mit besondern gnaden. Jr wollet vns zu gnedigsten gefallen die Verfugung thun. Das dasselb ausgeschifft. vnnd jn eine guthe gewarsam gebracht. vnns auch von allem dem jenigen so jm gerurten schiff an schweuel vnnd anderer whar vorhanden vnnd aussgelöst. bey zeigerm vnserm Botten ein Richtige verzeichnus vbersenden. vnnser gelegenheit souil besser vnd beqvemer darnach antzustellen. vnd damit zuuerfaren vnd zuuerordnen. Jn dem allen ertzeige Jr vns einen gnedigsten willen von vns zuerspuren.