Friderich der ander konig Gotts gnaden zu Denemarcken, Norwegen, der Wenden unnd Gotten khöning, hertzög zu Schleßwig, Holsteinn, Stormarn und der Dithmarschen, graff zu Oldenburg unnd Delmenhorst.

Unsernn gnedigsten willen zuvor, ersame besondere liebenn. Waß abermals unser lieber getrewer Heinrich Muhm zu abwehrung deß muttwilligen eingrifs, so ime ann der vonn unns inn Ißlandt erlangtenn begnadung, durch eurenn schiffernn Bernndt Losekann uber unser gnedigste verwahrnung, unns und unsere hoheitt zuwider, unnd verkurzung freventlich weitter begegnett werden soll, bei unns suchenn unnd bittenn thutt, habt ir inligenndt zuersehenn¹, unnd wir unns gar nicht versehenn, daß der gestaldtt unnser gnedigste warhnung und erzeigung so weinig inn acht gehabtt soltt wordenn seinn. Obwoll solchem frevell zubegegnenn gnugsam mittell, habenn wir die doch umb gutter nachbarschafft willenn viellieber umbgehenn, alß derselbigenn gebrauchenn, sonnder euch noch einns zum uberfluß aus gnadenn verwarnenn wollenn. Gnedigst begerenndt ihr bei erwehntenn schiffer unnd sonnstenn die endtliche unnd ernstliche verordnung thuenn wollett, daß solcher sigillation unnd handtierung gentzlich enthalttenn unnd weitter nicht gebraucht werdenn, domitt wir nicht zu obgerurtenn mittelnn zuschreittenn verursachtt unnd bewogenn werdenn, daß ihr dem zuverhuttenn werdett wissenn, unnd wir seinndt euch sonnstenn mit gnaden unnd nachbarlichenn willenn gewogenn. Datum uff unserm schloß Koppenhagenn, denn 4en martii anno etc. im 68en.

Friedrich