Ehrwerdige ehrbar unnd hochgelerde juwenn ehrw. synn unse gantzwillige deinste jeder tydt bereidt thovor, gunstige her. Watt by i. ehrw. wy hyrbevornn vann wegenn der havenn Kummerwage in Ißlandt, beyde mundtlick unnde schrifftlick gesacht unde gebedenn, darup dann iuwe ehrw. aller gunstigenn beforderung¹ (dessenn wy billick dackbar) jegen unnß sick hochlick erbadenn, datt alleß hebbenn i. ehrw. sick noch unseß vorhapendeß gunstichlick thoberichten.

Wann wy dann nhu de vorsorge dragen, wo wy dessenn ock ungefehr berichtet, datt etlike, by der kon. mst. tho Dennemarckenn etc., unsenn gnedigsten herenn, wolvordenede personenn, sick umme solcke havenn bij ohrer konn. mst. bewerven, unnd unnß tho mercklikem vorfange, hochster beschwer und nachteill, ja ock tho unsem entlikenn vorderve, van dersulven (ungeachtet wy de aver minschenn gedencken, besegeldt unde darvor alle schuldige gebernuß ahne jenigenn vorwithtett, affdrengenn mochtenn. Wy averst tho juwer ehrw. dersulvenn wolgeneigedenn thosagenn nha, unnß aller gunstegenn beforderung vortrostenn, und i. ehrw. by der mehr und hochstgedachten kon. mst. vor anderenn wolvordeneden personen deß vortreflikenn ansehenß wehten, datt unß bij dersulvenn juwer ehrw. vorbitlike beforderung ungetwiveltt nicht unfruchtbar noch vorweigerlick af geschlagenn werden.

Alß bidde wy deinstlick, juwe ehrw. in dessem unse gunstige her unnd forderer synn, und by der konn. mst. etc. unse beste wehtenn, ock sovele jummer mögelick, de dinge darhenne richten wollen, darmede wy der bemeltenn havenn, ahne menichlikeß indrenck jegenn de gebohrlike erstadinge asservreret unde vorgewisset werdenn mochtenn.

Datt syn wy nevenn unsen mit vorwandten frundenn rehderen und kopludenn umme i. ehrw. mitt werkliker danckbarheitt thobeschuldenn und sunst dersulfftenn unseß jummern vormogendeß thodenende gantzwillich. Datum Bremen under unsenn pitzerenn, denn 21en octobris anno etc. 70.

Juwer ehrw.

gantzwillige

Johan Munstermann und Clauweß Wittesant, vor sick und in nahmen ohrer medevorwandtenn rehder und frunde, der havenn Kummerwage inn Ißlandt, borgere tho Bremenn.