Item dut bekenne ick Clawes Monnickhusen vor my unde myne erven gebaren edder undegebar und als weme dat ick hebben entfangen van deme ersamen manne alse Karsten Meier alse twolve gude ganckbare daler up dat eventtur van der se und sant in Islant up schipper Johan Munstermans sin schip und wen got gifft myt leve dat dat gude schip wedder uth Isslant kumpt so lave ick Clawes Monnickhusen edder myne erven deme baven benomten Karsten Meiger edder sinen erven dar vor wedder tho gevende alse vofftein gude daler sunder sinen schaden edder jenich vor toch edder rechtes fordringe, ock lave ick Clawes Monnickhusen deme baven benomten Karsten Meier edder sinen erven so fort alse unse ankumpt is eme den fort van deme huse tho leveren ene tunne trans und effte de tran den myn gulde alse de vofftein daler dat lave ick eme deme fort up tho leggen und tho betalende und gelt se ock after dat wil he my den na leggen des thor merer orkunde is is dut myn egen hant und myt mynen egen marcke under getagen, am jare do men schreff dusent viff hundert dar na im achten unde soventien jare.

Clawes Monnickhusen
min egen hantschrifft