Erbare und weise hern. Nach erbietunge meiner freuntwilligenn diennste zuvohrn, gebe ich ew. weiss. zuwissenn, das ich derselbenn schreibent¹ anbolangenndt dem ersamen Releff Gerdes, wie ehr sich auff mich referere, unnd ingewandt, das Joachim Kolling anno 81 in meiner jegenwardt, und vor mich zwei anndere borger vonn Hamborg, vor sich in borgen ausgesatzt, unnd ehr Releff Gerdeß derowegenn seinerr geliubte gentzlich solte enntfreiet, unnd loß gezalt sein ist mihr zu Neuburgg, denn XV dieses itzlauffenden manatdages zu hannden gekommen.

Wan ich den solcher, auff Eislanndt vor mihr gescheener burgschafft unnd geliubte, darmit sich vorgedachterr Joachim Kolling des arrestes (denn, ich ihne wegen Liuderr Ottersons, auff weiternn bescheet zubestrickenn, der zeit gesinnet) domals erleddigte, nicht kann in abreden seinn, habenn dennoch de guttenn leuthe, als nomlich Hans Foß schipferr, unnd Joachim Meinson kauffman, des gemelten Joachim Kollings nohdt unnd bedrenncknuß anngeseen, unnd aus mitleiden vor ihme als biurgen gelobet, doch conditionaliter, unnd mit dessenn vorworthenn: so ferne offtgenante Joachim Kolling, Liuder Otterrson keine gnogafftige burgen unnd cautionn, vor dißerr zeit gedahnn, wollenn als denn, vor genante Hanns Foß, unnd Joachim Meinson schiuldig unnd plichtig sein, gedachtenn Liuderr Otterson, alle denn hovetsummen, gantz unnd gentzlich zu erlegen etc. Als das de vorsigeltenn, unnd mit eigenen henden undergeschriebenn zeddelen, derenn eins Liuder Otterson, doch ime unnutzlich, bekommen, unnd den andern Joachim Kolling bei sich in verwahrung, zu einem memoriahl, behalten, den Liuder Ottersonn ein mahl zu befriedigen, mit claren wohrten weitlufftiger vermelden.

Nu hatt ja ehergedachter Liuder vor dato der vorgenanten zweier zeddelenn, den guttenn mann Releff Gerdes als einenn burgen, vor gedachten Joachim Kolling zu voller gnoge anngenommen, unnd nachmals gesehenn, das vielegenanter Joachim, als ein unndanckbarerr, sich dennoch nicht willenn richtenn, sondern mit seiner rechenschafft unnd bezalunge hinderlistig verzogenn, ist ehr ferrer umb hulff bei mihr annzusuchenn, damit ehr dennoch zu letst seine bezalunge erlangen muchte genodigt wordenn, unnd also diße conditionalis promissio, darmit vielegenanter Kollinng, nicht in Islanndt gearresteret, und das ehr zum uberfluß, denn ehrgemelten Liuderr Otterson befriedigenn solte, erinnert wurde damals vor mich gescheen, und ergangen.

Worauß euw. w. gnuchsam werden sehen unnd schließen konnen, ob Releff Gerdeß, der burgschafft, als ehr vermeint genntzlich sei entfreiet unnd abgezalt, welchs ich denn ew. w. zu einer freuntlichen antwort widderumb habe schreibenn wollen, unnd bei den selbenn allezeit zu wilfahrenn, meinem weinigem vermugen nach freuntwillig. Geschrieben zu Kopennhagen, den 17 aprilis anno etc. 1583.

Johann Bocholtz