Durchleuchtigster, großmechtiger konningk, gnedigster herr, auch wohlgebornne edle, gestrenge, unnd ehrnveste, ihrer ko. maytt. zu der regierung, vorordentte herrn reichßräthe, gebiettende herren, euer ko. maytt. und g. mag ich untterthenigst nicht vorhaltten, das vorschienen Michaele¹ ich zu Koppenhagen gewesen, unnd denen dohmals daselbst anwesenden herren regierungs rähten, underschiedliche zwene vorschrifften, die eine vonn hertzogk Heinrich Julius zu Braunschweigk etc., die ander vom rath zu Brehmen,² uberantworttet, welche deß inhalts, daß meinem herrenn Dettmar Kenckeln burgernn, und deß hochgemelttenn hertzogenn zu Braunschweigk etc. factorn zu Bremen, eine hafe inn Ißlannd genömett Stappenn, in Schneveß sussell, vonn euer ko. maytt. unnd g. verlehnett werdenn möchte. Wann nun aber befunden, daß derselb haffe vonn einem anndern itzo besiegeltt, unnd besucht wirdt,³ unnd eß derowegen, nicht zuerhaltten gewesenn, habe ich dohmals nicht destoweniger, umb ein andere haffe, genömett, Durhollmerhi, unnd liegennde bey Ostennmudall, welche zuvor von einigen menschen nicht besiegelt werden kuntte, in warheitt euer ko. maytt. untterthanen daselbst mercklich domitt gedienett, untterthenigst gesuchtt, unnd angehaltten, die domals anwesenden herren regierungs rähte, aber haben in dehme allein, abwesens der anderenn, nichtes vorordenenn wollenn, sonndernn zum bescheide gegeben, daß ich uf ein ander zeitt alß itzo, wan euer g. alle beyeinander wiederumb anhalttenn, unnd alß denne gutten bescheidt, bekomenn soltte. Alß ist an euer ko. maytt. und g. mein untterthenigste bitte, die wollen sich hierinne gnedigst erzeigenn, und mitt solcher haffen, Durcholmere gedachtes hertzogenn vonn Braunschweigk factorn vorlehnen, unnd ein paß, dorauff gnedigst werden laßen, wier wollenn unns mitt zufuhrung, unnd leidlicher verhandelung gutter, unstrafflicher wahre, mitt euer ko. maytt. untterthanen also erzeigen, daß denselben inn warheidt damitt auch nicht wenigk gedeinett sein solle, unnd thue euer ko. maytt. und g. hiermitt gott dem allmechtigenn, zuerhaltung, unnd bewahrung, guter langer leibes gesundheidt, und glucklicher regierung, und wohlfardt vonn hertzenn wundtzschenn, unnd besehlenn etc.

E. ko. maytt. unnd g.

Untterthenigster gehorsamer

Curdt Walleman.