Gestrengedle, unnd ernveste, e. gest. herl. unnd seinn unsere gantzwillige dienste, jeder zeytt bevor großgunstige herrenn, wir muegenn e. gest. herl. unnd gst. nicht furhaltenn, welcher gestaltt wir an die selb gegenwertigenn unserenn secretarium, Daniel Bisterfeldt mit schrifft, unndt mundlichenn werbungen darann unß unnd denn gemeinenn Ißlander fahrerenn, unserenn burgeren mercklich gelegenn, dienstlich abgeferdigtt.

Bitten demnach dienstlich, e. gest. herll. unnd gst. den selbigenn unserenn secretarium zu gunstiger audientz zugestattenn, ihme gleich unß selber volnkommenen glaubenn beyzumeßenn, unnd sich auf seine untherdienstliche angebrachte werbunge, mit gunstiger andwortt vernemmen zulaßenn, das getrostenn zu e. gest. herl. unnd gst. wir unß, dienstlich, unnd sein eß deroselbenn (die wir hiemitt dem gnadenreichenn schutz gotteß gantz getrewlich empfelenn) hinwiederumb angenembe wilferige dienste zuerzeigenn willig unnd urbuttig. Datum unther unser stadt secret, denn 5ten decembris anno etc. 91.

Burgermeistere unnd rath der stadt Bremenn.