Durchleuchtigster, großmechtigster kuning, e. kun. maytt. seinn unsere underthenigste gantzwilligste dienste, jederzeytt, sonderß fleißes zuvoran bereytt gnedigster furst unnd herr, e. kun. maytt., sollenn wyr underthenigst nicht purgenn, das unß unser burger Berendt Jons, dienstlich zuerkennen gegebenn, waß maßenn e. kun. maytt., deroselbenn underthanenn Pawell Jonsenn, ungeferlich vor vier jahrenn, auf seinn underthenigst ansuchen gnedigste paßbrieve, die havinge Flatto in Badestrant sußell, mit seinen wahrenn zu besuchenn gnedigst mitgetheylett,¹ unnd er Pawell Jonsenn ferner solchenn paß gemelten unserenn burger, so auch e. kun. maytt. underthann unnd in Ißlandt geborenn, mitt bewilligung e. kun. maytt. unnd derenn furtreffendliche räthe wieder ubergelaßenn hette. Inmaßenn er auch darauf den leuten der orther allerhand notrufftige wahre, alß meell, maltz bier unnd derogleichenn, welchs sie zuerhaltunge ihres leybes, unnd lebens bedurfftig, und nycht woll endratenn konnenn, zugefurett, und dakegenn vonn ihnenn fisch traen, unnd andere des orths fallende wahre permutieret, verbeutett unnd angenommenn, doneben auch e. kun. maytt. beamptenn denn geburlichenn zollen endrichtett unnd bezalett. Nachdem nun aber die, von e. kun. maytt. auff solche have erlangte paßbrieve, auf vier jhare gerichtett gewesenn, unnd dieselbige numehr mit ablauff dieses drey unnd neuntzigstenn jahres endschafft erreichtt; unnd dahero seine notrufft erfurderte, bey e. kun. maytt. umb andere kunigliche concession unnd paßbrieve underthenigst zu sollicitiren zu bittenn unnd anzuhalten. So hatt er unß dembach dienstlich ersuchtt, unnd gebettenn ihme zudero behuf diese unsere underthenigste intercession gunstiglich mitzutheylenn.

Wann wyr nun die unsere bey ihrer gewonlichenn narung, so viel immerda muglich gerne behaltenn unnd befurdertt segenn, unnd dann nicht allein gemelte have vor langen und vielen jharen von unserenn burgeren, auf e. kun. maytt., unnd derenn hochloblichste vorfarenn unnd kuninge der reiche Dennemarken etc. sondere begnadung besiegeltt, sonderenn auch itzgedachter unser burger Berent Jonsenn im e. kun. maytt. lande in Ißland geborenn, und also deroselben getreuer underthon mitt ist.

Alß gelangett demnach an e. kun. maytt. unsere underthenigste bitte, dieselbe gnedigst geruhenn, gedachtenn e. kun. maytt. underthanen unnd unserenn burger auff ermelte have, neue kunigliche paßbrieve gnedigst mitzutheylen und zukom[men] zulaßen. Ist er dokegenn des v[...] erbietens e. kun. maytt. undert[hanen] der orther nach wie vor gute unstrafb[are] wahre zuzufurenn, unnd sunstenn e. [kun.] maytt. unnd deroselben alda gesetztenn befelichhaberenn gutachten und ordenung nebenß erlegung deß geburlichen zollens, dermaßenn gemeß zuverhaltenn, das verhoffendlich niemand sich uber ihnen mit furgenn zubeschwerenn habenn soll. Unnd wyr seint eß umb e. kun. maytt. die wyr hiemitt dem gnadenreichenn schu[tz] gottes deß almechtigenn zufrolicher leybeß gesundheytt, freudfertiger regier[ung] unnd allen kuniglichenn wolstande gantz getrewlich empfelen, underthenigst zuverdienenn willig unnd erbuttig. Datum unter unser stadt secret denn 4ten septembris anno etc. 93.

E. kun. maytt.

Underthenigste unndt gantzwilligste

Burgermeistere unnd rath der stadt Bremenn.