Wittlick kundt unde apenbar sy alle den gennen, de dissen zerter seen, effte horen lesen, Dat wy Laffrens Winckelman schipper van Rostock, Jacup Schapeßkop, unde Brandt Schmidt koplude hebben verkofft van unser frunde wegen, Deme Ersamen Thomas Dei van Feuersenn unsenn soltvisch, ßovele uns unde unsen frunden thokumpt, tho Lunden in Engelanth tho leveren, dath hundert lengen vor 4 punth sterlings, unde den dorsch vor 2 punth, Des schal he uns 2 punth aver den summen up den kop geven, unde den visch entfangen, alse he uth dem stapel visch uthgenamen vel und stannck, des Thomas Dei vorgenompt uns einen frien piloten schaffen und unß unse bethalinge entrichten, wenn wy godt geve mith leve tho Lunden in Engelandt kamen in 18 dagen, Sunder jenich vertoch, allenth wes wy daraver liggen, und nha der betalinge thoven, schal Thomas Dey van Feversenn unse kosth und theringe mith schip und gudt uprichten unde betalen. Hiran und aver Is gewest, Wilm Kar, Sander Lister, Peter Gerlefen, unde Johan Eversenn, und thor orkunde hebben Sander Lister, Peter Gerlesen und Johan Eversen disse tzerter mith eren egenen handen undertekenth, des tho mehrer orkunde und tuchenisse der warheit sinth dißser tzerter twe eines ludes de eine by uns, de ander by Thomas Dey, dorch de bockstave DEVS van einander gesneden, geschreven und gegeven In Hittlanth den 10. dach Octobris Anno 52.

Wo bavengeschreven bekenne ick Johan Eversen mith disser miner egen hanth,
Alxst? letter with my hand

Item wo bavengeschreven bekenne ick Laurentz Winckelman, Jacob Schapeßkop und Brandt Smydt.

Item dytt bekenne ick Peter Gerleveß wo baven geschreven.