Wolgeborner Graff, Kon. Kay. Cammerrichter, gnediger Herr, In der Appellation und nichtigkeit sachen, der Ersamen und weysen herren, Thomas Gerdes, Heinrich Dosse Burgermeisteren unnd Rathsherren Zw Rostock, unnd Christoff Butzow, unnd Ire consorten Appallanten ann einem, unnd Peter Schulten, angemaßen Anwaldt, Thomas Deyen Appellaten, Anders teils, an diesem hochlöblichen Cammergericht, sich erhaltende, auff o. g. 6. Julij Anno.65. eroffneten bescheidt, und damals in confirmaciam angenombene litis contestation, Auch den 30. Januarij, Jungst gegenteils erscheinen, ferner zuvolfaren, Erscheint Anwaldt, der Appelante, unnd bringet gerichtlich fur, diese nachgesetzte Articulirte gravamina, sacht dieselben in iure et facto, wahr unnd beweyslich sein, mit undertheniger vleißiger bitt, den gegenteil oder glaube nit wahr sein, ohn allen andern anhang, darauff Zu anthwortten an Zuhalten, Was dann deren von dem gegenteil vermeinth, erbeuth sich Anwaldt, doch außgeschloßen allen Uberfluß, davon er hiemit Protestiren, bey Zubringen, Bitt Auch underthenig, sich unnd seine Principaln, alsdann dar Zw Zulaßen.

1. Setzt demnach wahr sein, das Appellante, Anno ungefehrlichen 52. ein Schiff, mit Melh, Bier und anderer Wahr, Zw Rostock beladen, und dieselbige in Ißlandt schiffen wöllenn.

2. Item wahr, Als Lorentzs Winckelman, Jacob Schapeskop seliger, unnd Brandt Schmidt, mit solichem schiff also geladen abgelauffen und in die see khommen, dar sie durch ungewitter unnd ungelegenheit der Zeyt, an der furgenohmmenen Reiß verhindert worden, unnd derowegen in Hidtlandt geblieben.

3. Item wahr, das sie Ihre und Ihrer Schiffsfreünde, war und gueth, so sie Zw Rostock geladen, unnd in dem Schiff hatten, alda verkaufft, unnd Permutiert, und gesaltzenen und newen Fischs, widerumb daran genuhmmen, und Zw sich gekaufft.

4. Item wahr, das sie mit solichem vischs in Engellandt schiffen wöllen.

5. Item wahr, weyl sie der see an denselben örttern, nach Engellandt unkundig, das sie nach einem geschickten, unnd derselben örttern erfahrnen Piloten oder steurman, umbgethan unnd geworben haben.

6. Item wahr, wie solchs. Thomas Dey Appellaten Principal vernohmmen, hatt er sich an erwente Lorentzs Winckelman, Jacob Schapeskop, unnd Brandt Schmidt begeben, unnd Inen der örtter nach Engellandt, einen erfarnen Piloten oder Stuerman, Zuverschaffen angeboten, doch mit diesem beschaidt und Condition, das sie Ime allen den vischs niewen und gesaltzenen, so sie in dem schiff hetten verkauffen, unnd Zw Lunden in Engellandt lieffern solten.

7. Item wahr, dar sie mit erneutem Thomas Deyen, auff solch erbietten, das er Inen der örtter nach Engellandt, einen erfahrnen Stuerman verschaffen woltte, unnd solte sich des kauffs verglichen, unnd allen vische, den sie im schiff gehabt, itzliches hundert lengen, umb iiii Pfundt sterlingk, thutt ungeferlichen, [...] thaler, unnd den dorsch, fur 2. Pfundt verkaufft, unnd Zw Lunden, in Engellandt Zw liefferen Zwgesagt.

8. Item wahr, das vielgedachter Thomas Deye Appellaten Principal, Inen den angebottenen Stuerman, der das schiff dahin gehn Lunden, In Engellandt, fueren soltt, Zuverschaffen sich widerumb verpflichtet unnd zwgesagt.

9. Item wahr, das Thomas Deye, solicher seiner gethanen Zwsage, Zw wider einen ungeschickten, unnd der See nach Engellandt, gantzs unerfarnen Stuerman, auff das Schiff gesetzt unnd geordnet hatt.

10. Item wahr, als sie aus der haven oder Porto, Schalwagen in Hidtlandt, nach Engellandt, mit dem schiffe außgelauffen, unnd drey gantze tag unnd nacht, In der See gewesen, das der Schiffer das loth oder gewicht geworffen, unnd 26. klafftern tieffe, unnd schwartzen steingrundt gefunden.

11. Item wahr, das der Schiffer, der Stuerman gefraget, was das fur ein grundt, unnd an welchen orth sie weren, darauff der Stuerman geantwortet Er wüstenn es nitt.

12. Item wahr, wo der Stuerman, der See unnd örtter erfahren were gewesen, das sie Engellandt, woll hetten erlangen unnd dahin khommen muegen.

13. Item wahr, das sie Acht gantzen tag und nacht, unnd mehr, in der see, auff unnd nider aus unwissenheit, des Stuermans, also Irrig gefahren, unnd hin unnd her getrieben worden seindt.

14. Item wahr, das soliches Im wintter, nach Martini, do die See, an Ir selb ungestumb, geschehen ist.

15. Item wahr, das das Schiff, durch soliche ungeschicktlicheit, des Piloten, einmal fast uff den grundt gelauffen, unnd sie derhalb schiffbruch erlitten hetten.

16. Item wahr, das Schiff, guet, unnd die Leuth, so darauff waren, derwegen In großer unnd Leibsgefahrt gewesen, Auch durch die ungeschicklichteit des Stuermans, mehr darin gesetzt worden seindt.

17. Item wahr, Als sie in solicher gefahr gewesen, unnd der Schiffer unnd schiffsvolck, nachmals den Stuerman und Thomas Deyen Appellaten Principaln, selbst angeredt, ob sie Auch der örtter unnd gründe, darauff sie waren, kunth unnd wissenschafft hetten.

18. Item wahr, das gedachter Stuerman, und Thomas Deye, geanthwortet, sie wüsten keinen Rath, kondte der Schiffer, oder sonsten Jemandt Rath finden, den soltt man brauchen.

19. Item Wahr, das Thomas Deye, ferner gesagt, er wöltte, das Er Zw landt sein möchte, es were, wo es were, fragte nicht groß, nach dem vische.

20. Item wahr, sie Zw rettung Ires Leibes unnd Lebens, schiffes unnd guetes, das Schiffe derhalben nach der Elbe, das sie bekanth dregen, unnd lauffen zulassen, auß solicher hochdrenglicher noth gedrungen worden.

21. Item wahr, das der Stuerman, uber diese seine ungeschicklicheit, sich der sachen wenig angenohmmen, und derselben keine Acht gehabt, sonder In der Kaegge?, die gantzs nacht uber gelegen ist, unnd geschlaffen hatt.

22. Item wahr, wie sie Zw Hamburg, also ankommen, das sie Appellaten Principal Thomas Deyn, Zw gemueth gefuereth, wie das Lorentzs Winckelman, Jacob Schapeskop, unnd Brandt Schmidt, für Ire Person, den auffgerichten Kauff, allenthalben gemeß gelebt, Weyl er aber seiner Zwsage Zw widern, einen ungeschickten unnd unerfarnen Stuerman, auff das Schiff geordnet, dadurch sie In Engellandt, Zw khommen verhindert und An einen Andern, Inen gantzs ungelegenen orth, nit mit geringem schaden, unnd Leibs gefahr, angelangt weren, Das derwegen Zw ersetzung, Irer verseumnus unnd schaden, ettwas mehrs dorch geringers In den kauff, wie es In solichen fellen gebreuchlichen, gegeben, unnd einen geschickten Stuerman, verschaffen möchte, wo er solchs bewilligen unnd Zwsagen würde, das sie Ime den vischs nachmals, darauff In Engellandt schiffen, unnd Zw Lunden lieffern wolten.

23. Item wahr, das er sich dessen gentzlich gewaigerth.

24. Item wahr, Als sie alda, Auch Apppellaten Principaln, unvermögen gnugsam vernohmmen, unnd das Er den abgekaufften vische, Inen Zw bezalen nit vermöchte, das sie von Ime der bezalung halben cautionem begeret.

25. Item Wahr, das er solch Caution, wie bekanth, er Auch Zw Hamburg gewesen, nit bestellen können.

26. Item wahr, das des orths da Er Thomas Deye gelebt unnd gewohnet, weiniglichen bewust, unnd ein gemein geschrey ist, das er da Zumal ein verdorbener Kauffman gewesen, und sovil nit gehabt, das er den vischs bezalen mögen.

27. Item wahr, weyl er denn Auffgerichten unnd abgerechten vertrag, dar er einen geschickten und erfarnen Stuerman, uf das schiff verordnen soltte, nicht gemeß gelebtt, das Auch den verkauffer Lorentzs Winckelman, unnd seinen Ahntverwanthen, In dem selbigen Kauff, Auch aus dieser ursachen Zustehen, und Zw bleiben nicht schuldig.

28. Item Wahr, das Lorentzs Winckelman, unnd seine Consorten, dadurch nit geringer schadt Zwgefuegt worden, dann sie den vischs ettlich hundert thaler neher unnd wolfeiler geben mueßen, Als sie In sonst verkaufft hetten, desgleichen das sie durch Thomas Deyen Stuermans ungeschicklicheit, In Engellandt Zu khommen, und Iren frommen Alda, Zw schaffen verhindert worden.

29. Item Wahr, das dessen allen ungedacht, ein Erbar Rath Zw Hamburg, uf Thomas Deyen ansuchen, das schiff unnd gueth, unbillicher Weyß Arrestiren laßen.

30. Item wahr, das Lorentzs Winckelman, Jacob Schapeskop, und Berndt Brandt[!], Zw erledigung unnd Relaxation, soliches unrechtmessigen Arrests, Bürgen, dem Rechten alda Zuerwarthen bestallen mueßen.

31. Item wahr, das Thomas Deyen Anwaldt, ein vermeinthe Rechtfertigung, wider dieselben Burgen, unnd viel erwenthe drey Principaln, Lorentzs Winckelman, Jacob Schapeskop, unnd Brandt Schmidt einstellen laßen.

32. Item wahr, das ein Erbar Rath Zw Hamburg, uber den Zw[...], unbillichen uferlagten Arrest, erkendt, weyl den ietzt erwenthen drey Principaln, dazumal beklageten Zeugnus, seiner nichtigkeit halben verworffen were, das sie darnach ferner Zeugnus Zefueren, nicht zugelaßen werden solten.

33. Item Wahr, das gedachte drey Principaln, Lorentzs Winckelman, Jacob Schapeskop, unnd Brandt Schmidt, In dem, mercklichen beschwerth, unnd Inen Ir Rechtmeßigkeit beweyß, salvo honore iudicum, damit unbillichen unnd widerrecht abgestrickt worden.

34. Item Wahr, Als die beeden Principaln, Lorentzs Winckelman, unnd Jacob Schapeskop verstorben, das Ir Procuruer Liborius Hoppe, An herren Thomas Gerdes, Henrich Dosse, Burgermeistern unnd Rathsfreunde Zw Rostock, Auch Christoff Butzowen, unnnd Andere Schiffsfreünde, die angestelte Rechtfertigung vermeldet, unnd ob sie sich Auch einlassen, unnd Ime gewaldt Zu schicken wolten, an sie gelangen laßen.

35. Item Wahr, das sie darauff gedachtem procuratori, einnem gemeßenen bevelch declinatoriam fori, Zw apponiren uberschicket haben.

36. Item wahr, das ermelter Procurator, solche Ire exception, fur dem Rath Zw Hamburg fur gewandet, unnd in scriptis ubergebenn.

37. Item wahr, das er dieselbig, In allen handlungen offtmals erholet.

38. Item wahr, das Appellanten Zw solicher Rechtfertigung, niemals geladen worden seindt.

39. Item wahr, das Appellaten mandatum, wider viel gewente Lorentzs Winckelman, unnd Jacob Schapeskop, unnd Brandt Schmidt, unnd derselben erben, alleine lauthet unnd gerichtet Ist.

40. Item wahr, das dessen alles ungeacht, ein Erbar Zw Hamburg, In verschienen 64. Jare, den 6. Novembris, wider Appellanten erkendt, das Appellate Peter Schultte. seine ubergebenen liquidation schifft, wider sie beeidigen soltte.

41. Item wahr, das solch vormeinth unnd nichtig urtheil, erst den 20. Novembris derselbigen Jars eröffnet unnd Publiciert worden.

42. Item Wahr, das gedachter Appellanten Anwaldt, alsbaldt uff unverwenten fueß an, diß hochlöblich Key: Cammergericht, In nahmen unnd wegen seiner Principaln, davon Appeliert hatt.

43. Item Wahr, das er darnach, dieselbige gescheene Mundtliche Appellation, fur Notarien unnd Zeügen, Innerhalb Rechtlicher frist Reiteriert und erholet hatt.

44. Item wahr, das soliche Appellation, bißhero wie sichs gebueret Prosequirt, unnd nach verfolgett wirdtt.

Dieweyl dann Gnediger Herr, disse sach, ob Articulierter masse sich erhelt, so Ist Anwaldts In Nahmen unnd wegen, seiner Principal, an E. G. unthertenige unnd vleißige bitt, sie wöllen, Im Recht erkennen unnd außsprechen, wie hierüber in summario libello appellationis gebetten worden, Oder wie sonsten Am formblichsten unnd fueglichsten, gebetten worden sein soltte, kundte oder möchte, In dem Aller E. G. hochadelich, mildt, Richterlich Ambt, gantzs unterthenig, unnd vleißig anwuessende.

Vorbehaltlichen aller Rechtlichen Notturfftt.

(other hand)

Haffner