1. De olderlude der Bargerfahrer bynnen Lubeck residerende hebben vor deme radtstole stande den heren radesszendebaden der sosz Wendisschen stede vortellet, wo szick de copman der Bargerfarer to velemalen boclaget, dat durch unwontlike Iszlandescke reyse ock tho Hytlande und Fero, szo szick itlike in geringeme talle bynnen Bremen und Hamborch understunden, dat kuntor to Bargen szer geswaket und in korten jaren gentzliken undergan wurde, dat Godt vorhode, weret sodane myt tytlikeme rade nicht remediert wurde, biddende, sulcke reysze uth Iszlandt up de Elve mochte afgestellet und van der Elve in Iszlandt und van dar strax in Engellandt to szegelen, wo vor druttich ock 35 jaren gescheen.

2. Eyn ersame radt to Lubeck mitsambt den heren radesszendebaden vorbenomet hebben nha bosprake deme erhaftigen mester Johan Reyneken, der ersamen van Hamborch prothonotarien, szeggen laten, na deme de ersamen van deme Stralesszunde und Lunenborch an den radt tho Lubeck up dussen dach gschreven, der Iszlandesschen reyse by gemeyner anzestede recessen to blyven, is eyn articel uth deme recesse anni etc. 18 jungistvorschenen, wo de, so by ordinantie der stede unhorszam syn und vorbaden reysze bosoken, to straffen etc., geleszen.¹ Und so men vormercket, dat de Iszlandessche reyse van dar strax up de Elve to undergange und vordarve des kuntors to Bargen unde vort veler stede coplude rekende, so bogerden sze, dat he wolde mit den besten an syne beren dragen, by den oren to vorschaffen, de Iszlandessche reyse etc. wo gemene stede boslaten und nichts anders to holden, und dar by de wolfart des guden kuntors und wes by undergange dessulven velen steden gelegen to bodencken; dar avers sodans baven tovorsicht nicht gschege, wurde men vorvorsaket, dar tegen nach vormoge der recesse vorttofaren etc.

3. Item furder is dosulves bolevet, dat eyn ersame radt tho Lubeck schal macht hebben, mede in namen der anderen Wendeschen stede an de stede ores dordendels nach oreme gudtduncken van wegen der kuntor tho schrivende etc.