...

115. Und, so de artikel der gebreke, ock eyn breff der confirmation der privilegien des cunthors tho Bargen, van heren Frederick, koningen tho Dennemarcken etc., uthgegeven und vorlenet,¹ ock etlicke artikel uth deme recesze anni etc. (15)18² und eyn privilegium heren Cristierns, etwan koninges tho Dennemarcken, de bosokinge und segelation der eylande Orkeney, Hytlandt, Fero und Islandt bolangen,³ ock ein breff, van gemeynen anzesteden ime jare (14)94 tho Bremen deme kopmanne desulvigen segelation botreffende gegeven,⁴ apenbar und averludt gelesen und darna durch desulvigen olderlude, dat de dinge van one in rade mochten genamen und de ungehorsamen junge koplude, gestraffet werden, gebeden ...

...

161. De negede artikel van der Islandesschen reyse, dewile van den ersamen van Bremen angetagen, dat weinige schepe uth orer stadt in Iszlandt segellden und doch de Iszlandessche visch an de orde wurde gefuret, dar de Bargervisch nicht gebracht wurde edder tho dure were etc. Und van den ersamen van Hamburch angetagen, dat andere fromde natien de reyse gebrukeden, dardurch se den oren ovel desulvigen mochten vorbeden, sunder na itziger gelegenheit der werlt, dewile men wol wuste, wat ermals derhalven to Hamburg gebort etc. Worumme na veleme ratslage isz vorlaten, de Bergerfarer tho persuaderen desser tydt fredelick darmit tho szinde und geschen tho laten, beth dat idt fugeliker mochte geremediert werden.

...

168. Darna geschach durch heren Thomas van Wickeden, Lubeschen borghermester, relation, dat he sampt den anderen heren Lubeschen borghermesteren de olderlude der Bargerfarer angeredet und up den artikel der Iszlandeschen reyse deme int vorlate gisteren genamen na beste gepersuaderet, und wolden na itziger gelegenheit darmede syn gesediget, doch mit bede, de erbaren rede der stede wolden also darin sehn, alse dat de notroft forderde und vor dat gemeine beste und gude cunthor syn wolde.

...