Mynn willich vnnd gantz fruntlich denst mitt vormoge alles guden touorn. Gestrenge erenfeste besonder gunstige herre vnnd fruntlike leue swager, Nademe de dorchluchtigeste vnse genedigeste leue herre koning Frederich loueliger gedechtnisse, syner genaden secretarien Thomas Koppenn de tijt synes leuendes, jnn belonunge syner swarenn denste, de he denn ryken vnd syner k: mait: lange tijt gedann, mit dem landekenn Ferø genedigenn belehnet hefft, daran he keynenn twyfel hefft dat juwe gestrengicheit vnnd de andernn rykes rede ehme des gerne gunnen, des gelykenn myn g. h. hertog Cristian, ehme ock gerne gunnet wo s. f. g. derhaluen an juwe gestrengicheit ock geschrefenn hebben, vnd he Thomas, sich doch besorget, dat ehme etlige koplude von Bergen vth, dar henn to segelende, vorfang vnd schaden don mochten, dar vp js myn fruntlich biddent dat juwe gestrengicheit in betrachtunge synes langen denstes, och dat he dagelykes noch wol denen kan, vnnd juwer gestrengicheit sunderlich gerne denet, synn gunstige herre syn, vnd synem gegen deel, jfft dar etlige vann Bergen vth dar hen segelenn wolden, na vormeldunge mynes g. h. hertogenn Cristians schrifftenn, nicht gestaden sunder vorhinderenn willenn, damit Thomas des landes, na vormoge syner vorschrifunge, fredesam gebruken mogenn, wo ock billick js. datt sich juwe gestrengicheit, darjnne gunstich vnnd gutwillich ertogenn werdenn, des wil ick inn fruntliger meynunge alszo vortrostenn vnd weddervmb fruntlich vnnd willich gern, vordenen, dem almechtigen mit alle denn juwen lange gesunt befalenn, Datum Hamburg sondages Letare, anno dominj mdxxxiiij.

Gotschalck van Alefelde to Norborch.¹

Noch tor tijdt js alhijr, twuschen den Hollanderen vnd den Lubeckschenn nicht sunderliges gehandelt wo de ende syn werdet, schal Thomas van myner wegen hyrnamals an juwe gestrengicheit schrifen, Jfft jm ryke Noruegen wes nyges dat wellet mij ock schrifen laten js mijn fruntlike bede.