15340306HAM00

1534, March 6

Hamburg

Thomas Koppen to Eske Bille, commander of Bergenhus: sends him a copy of his enfeoffment with the Faroes, and asks not to send a ship there to his detriment. Moreover, he sends him two barrels of Hamburg beer and a cake for his wife, as well as news about the political situation in Denmark and Germany.

Created for and published on the HANSdoc website of the German Maritime Museum, Bremerhaven, by Bart Holterman in the context of the research project Between the North Sea and the Norwegian Sea: interdisciplinary Studies of the Hanse. Licensed CC BY.

Copenhagen, Rigsarkivet

Eske Bille, II B a 2

Paper

Traces of three seals

Low German

Facsimile not (yet) available

Diplomatarium Norvegicum 23:357
Degn, Anton, Nøkur gomul, áður óprentað brøv o. a. Føroyum viðvíkjandi (Tórshavn 1939), p. 18.

Dem gestrengen vnnd erenfestenn hernn Esche Bildenn ritter vnnd amptman vp Bergenhusz jn Noruegen mynem besondernn gunstigen Hern.

Mynn gantz willich dinst mit vlijte touorn. Gestrenge erenfeste gunstige herr. Jck schicke herjnne vorslatenn warhafftige copien myner vorsegelinge da ick vp datt landt Fferøø hebbe. Vnnd vmme older kuntschap willen de ick mit juwer gestrengicheyt juwen broder1 vnd juwenn andernn frundenn ock des rykes redenn hebbe deme na szo hebbe ick gar keynenn twyfel yuwe gestengicheit werdenn mij darjnne nicht hynderenn ader vorfang dohn. Jfft auerst ander2 mij to nadeyle vorfang vnnd schadenn von Bergenn vth eyn schyp darhenn frachten woldenn darvmme hebbe ick von mynem genedigenn leuen hernn hertog Cristien etc. ock vonn dem gestrengen hern Johan Rantzow Dannemarkes rykes raidt vnd andern desse by gebunden vorschriffte3 an juwe gestrengicheit gebedenn mit gantzenn vlijte denstlich biddende dat juwe gestengicheit mijn gunstiger herre syn vnd myn beste darjnne ramen willenn dat vordene ick alle mijnes vormogens gutwilligen gerne alse ick alle tyt juwe juwer broder vnnd frunde dener gerne bynn vnd bidde des juwer gestrengicheit gunstige antwort mit gegenwordigem. Jck kan wol dansk lesen vnnd vorstan auerst nicht schrifenn wente jck plege hijr juwe breffe de gij paa dansk her schrijfen latenn to lesende dem rade vnnd Herman Elebeken ock forder na Dannemarken vnnd Holsten to bestellende darvmme watt gy hyr gedan ock by mynem genedigen hernn hertogen Cristian vnnd jn Dannemarken bestellet willen hebben schrifet an mij jck bynn juwe deuer dat ick vor dusser tydt derwegen an juwe gestengicheit nicht gescrefenn werde ick hijr namals schryfenn deme almechtigenn gade wil ick jw vnnd juwe leue husfruwen vnnd kynderen lange gesunt vnd frolich befalen hebben. Amen. Datum Hamburg fridages na reminiscere anno dominj4 mdxxxiiij.

Juwer gestrengicheit gutwilige dener Thomas Koppen

Gunstige leue her Esche jck sende jw bij gegenwordigen Hans Roggen5 ij tonner fersk hamborger øll vnnd juwer leuen husfruwen eynen groten kokenn. Bidde fruntlich latet jw dat geringe nicht vorsmaden.

TK

Nijge tijdunge

Am dage Dorothee reijt myn genedige herr hertog Cristian auer de Elffe vnd dussen dach js he hyr wedder auer jnt landt gekamen vnd hefft gewest by dan landtgrafen to Hessenn vnd dar mit den forsten van Br[un]swijg van Luneborch vom Wertenberge vnnd anderen velen herrn vastellauent geholden tornijret geronnet vnd gestekt vnd vele fruntschap gemaket ock mit dem bischoppe von Bremen vnd andern hern.

De hollander vnd lubeckschen holden hyr to Hamborch dachfart de keyser hefft hyr geschicket den bischop von Brixen doctor Gerd Mulert her Cornelius Bennijng borgermester to Amsterdam. de stede de hyr gekamen syn Lubeck Bremen Dantzck Rostock Szund Wysmar vnnd Luneborch wo sich dut endiget sall ick jw mit dem erstenn schepe schrifen.

Hertog Carsten vnd Dannemarkes rijkes raidt hebben mit dem keyser faste fruntschap gemaket.

Melchior Rantzow vnd Gotschalck vann Alefeldt beden jw vele guder nacht.

Transcript copied from Diplomatarium Norvegicum.