...

24. Item tome laesten, ßo dan etlyke Islandesvarer ahm jongesten vorgangen jaere 1532 in Islande in den steden unser heren Bremen unde Hamborch wanende, af unde ahn vorkerende, dem vagede k^r w. van Dennemarcken milder dechtnyssen darselvest byplichtende, hebben etlyke der Engelschen copvaerers im vorgenanten lande jamerlyken doethgeslagen, vormordet unde darnach berovet unde erer schepe part dardorch vorloren unde eyn van denselvigen up de Elve gebracht, wordorch de Engelschen im rike van Engellant dem heren konnyng, erem gnedygesten naturlyken heren, swarlyken unde jamerlyken over deselvigen handtdadygen geclaget. Derwegen heft der here canceller k^r w. van Engellant uth beveyl k^r w. unde des rikes hogen raedes vor den copman gesant, bytterlyken de ßake geopent, vorgedragen unde vortellet, nichtestomyn den copman dreflyken unde mercklyken overgehalet, alße de scryftlyken breve nefens den muntlyken gewarven, darby by twen clarcken des loeflyken Lundeschen quuntoers by unßen heren Bremen unde Hamborch to twen sunderigen tyden ghescheyn, wider doen vorhalen unde undecken, wördorch idt gude quunthoer to London doen tor tydt in grote vaer gestalt wart, darnefens der copman to dreflyker geltspildynge dorch de vorgedachten undaeth nothgedrenghet. Idt gude quunthoer den gemeynen steden unde nation tosamrende geboret unde gescheyn de summe is net tweundeseventych lb., twe schillinge, soeß penninge sterling, eyn erßame copman byddende unde begerende, eyn sodan vorgenante gelt mochte by den vorgenompten steden erer oberricheyt dem copman unde gemeynen besten betalt unde gegulden werden.¹ Darnefens ock allen unde eynen jewelycken de see tor nerynge ghebrukende in allen hanßesteden beveyl unde ernstlyke geboeth berecesset nu möge werden unde darnefens den selvigen medegegeven, dat ße zamptlich unde eyn elcker in besunder myt den Engelschen seevarenden lude stede unde frundtschäp holden mogen, dat idt gude quunthoer der gruntlyken vordarfnyssen, ßo vor ogen ist, de beter dardorch gehandthavet unde gereddet moege werden.