Nademe erbare hochgelarte und grodtgunstige hern, unß van i. e. w. am jungesten unsen jegen bericht unde nodtrofft schrifftlick innthobrinngennde tho rechte uperlecht unde bevalen geworden iß, so wille wy demena de wy seligen Luder Brummerß sonß hanndtschrifft hebben summariter unnde folgennder gestalt unse meinunnge unnde behelp i. e. w. hirmit tho vorstannde geven hebbenn, also dath wy unnd einn ider inn sunderheitt na lude unnde uthwisunge der hanndtschriffte seligenn Luder Brummen hebben, uff dath rechte eventuer vann der see, uff Segebade Detkenn schip inn de Hidtlannder redunge onnse penninnge vorschaten unnd gedhann. Dewile everst gemelte Luder seliger liveß swachheit unnde unmacht halvenn sulvest sodane hanndtschrifft tho makennde nen vormogennt gehadt, uff dath nemanndt vorkortett unnde vorvordelett unnde he ock einn gudt gewetent beholden mochte, hefft he sinen sone sodane hanndtschriffte thoschrivennde bevalenn, so vorhapen wy unnß e. g. w. h. unnde sinn ock gentzlick der tho vorsicht nademmale, unse penninnge beneven de ere inn de Hidtlander redunge vorstreckett unnde gekamen sinn, dath wy tho dem gelde so van den vorkofften gude gekamen so woll befögett unnde berechtigett sinn, gelick denen so sinn egen handdtschrifft hebbenn, den wy vorseen unß nicht dath yemanndt unnder unsen middell scholde geminnden werden. e. g. h. de seligen Luder Brummerß nagelaten weduwen ethweß van den gelde (dar dorch de gelovigenn vorkortett unnde benouwett werden mochten, gedenckett by tho brinngennde veleweiniger er thogevalle einn ehdt thoswerennde, dutsulvige allß whe vorgeschrevenn e. g. h. bekennen wy einn hellich unnd einn ider vor sine persone dath idt im grunde also de rechte warheitt is. Werden överst wor ettlicke unnder den unsen gevunndenn dese betichtigen alse de mit einer unnduchtigenn unnde krafftlosen hanndtschrifft den creditoribus er geldt aff tho trennen, unnde der Brummerschen, tho genetennde vormeinen unnder tho slannde, desulvigen mogen se namhafftich maken, erbeden sick tho leistende wath sick vann rechteß wegen dar tho egen unnd geborenn will. Hierinne e. g. h. werdt sick i. e. w. well weten tho berichtenn unnde unß van so danen gelde herkamende van den vorkofften gude (whe albereit vormeldett) nicht aff sundernn.

Folgen undergeschreven der sulvigen name, so deß sonß handtschriffte hebbenn.
Salige Dirick Wencken nagelaten weduwe
Dirick Koster
Johan Harriestede
Arendt Neiback
Hinrick Brummer
de Heiennsche
Hinrick Segelken frouwe
Süverdt Ötken¹