Durchleuchtigster großmechtigster kuning e. k. maytt. seinn unsere underthenigste unnd bereitwilligste dienste, iderzeytt sonderß fleyßes zuvoran, gnedigster herr, e. kun. maytt. sollenn wir underthenigst nicht bergenn, das unß Ebhart Schroderr Johann Hudemann, Jacob Koster, unnd etzliche andere unsere burgere, gantz beschwerlich clagende zuerkennenn gegebenn,¹ welcher gestalt sie vorschienenn frueling dieses itzlauffendenn sieben unndt achtzigstenn jares mit ihrem schiffe nach Ißlandt gelauffenn, unnd doselbst in die sechtzig last fisch, unnd drey last trann, unter welchem fische funff last e. kun. maytt. das ander ander mehrenteyls gerurtenn unserenn burgerenn theyls auch etzlichenn e. kun. maytt. underthanenn in Ißland zustendig gewesenn, eingeladen gehabt, in meinunge damit anhero nach Bremenn zu siegelenn, unnd solche wahr, sowoll ihrenn empfangenenn befehlich nach auf gutenn bescheyd unnd rechnung, alß auch fur ihre person zuverkauffenn, unnd ihre narung domit zutreyben, unnd alß sie nun ungeferlich auf der herreyse, zwischen das Reff unnd Hitlannd angekommenn werenn sie doselbst vonn etzlichenn losen bubenn, unnd freybeuterenn, derenn capiteyn Wicks unnd der schiffer Wodde heißenn soll, angefallenn die sie dan mit schiff, unnd guth weg genommen, aller ihrer kleyder unnd waß sie sunsten bey sich gehabt jemerlich beraubet, unnd folgendes ann Hittlanndt nackt, unnd bloß angesetz, unnd also ins elende gantz erbarmlich hin paßiren, unnd auß dem lande betlenn laßenn.

Unnd obwoll die unsere darauff denn seherauberenn berichtett, das e. kun. maytt. ein antheyll mit an denn guteren hette, in hofnunge ihnen solchs zu errettung, ihrer guter gedeyenn, unnd den losenn bubenn, vonn solchen ihren bosenn furnemenn abschreckenn soltte, das jedoch solchs vonn ihnenn alß vorwegenenn buben gar geringe geachtett, sonderenn sich dajegenn vast schunfflich, unnd trutzlich, horen laßenn das sie mit schiff unnd gute ihreß gefallens lauffenn unnd handelen wolte, wan eß auch e. kun. maytt. selbst zustendich, unnd sunsten niemannd antheyl daran hette, unnd also die siegell aufgeruckt unnd damit ihres wegs gelauffenn. Nun befundenn sie aber auß des altermans des Teutschenn cuntors inn Engeland Moritz Zimmerman, auf unserer an ihme gethones schreybentt derwegenn angelegter kundschafft, das gemelte seheraubere mit solchenn ihnen abgenommenen schiff unnd guterenn, zu Westschester in Engelandt angekommen doselbst die geraubtenn guter mehrentheyls öhne alleinn drey last fisches unnd etzlichen tran, so daselbst in arrest liegenn soll, vorkaufft unnd folgendeß das schiff biß in die insule Ille Manne genandt, aufgelegt habenn sollenn, inhalt seyn deß altermans beygefugtenn schreybens mit A signirt,² unnd darauß unß dienstlichs fleyßes angelangt unnd gebettenn solches gelegenheytt sowoll e. kun. maytt. unnd derenn underthanenn eigenenn interesse, alß auch der unserenn derwegen genommenen vorderblichenn schadens halber underthenig gelangenn zulaßen, unnd umb e. kun. maytt. gnedigste promotorial, unnd furbitt zuwiedererholung deß abgenommenen schiffs unnd guts, underthenigst unnd empsig zuersuchenn, unnd anzulangenn.

Wann wir dann der ungezweyffeltenn trostlichenn zuversicht sein, e. kun. maytt. sich solche unzimbliche unnd verpottene plackerey, unnd rauberey zum hochstenn mißfallenn laßenn unnd mit den unserenn dohero beschwertenn burgeren, sowoll alß mit e. k. maytt. eigenen underthanenn, ein christlichs mitleydenn gnedigst tragenn werdenn.

Allß bittenn wir underthenigst, e. k. maytt. gnedigst geruhenn, derenn underthonenn sowoll alß unserenn armen burgeren, denen dennoch ihre hochste, unnd euserste wolfart daranne gelegenn zugutem diesen beschwerlichenn zustanndt an hochst ermelte kun. maytt. inn Engelannd gnedigst gelangenn zulaßenn, unnd dobenebenn zuersuchenn, daß der unserenn volmechtiger Johann Hudemann, zu ihrenn abgenommenen schiff, unnd guterenn so vielen deßenn noch vorhandenn, oder auch zu erkundigenn sein muchtenn, wohin die vorkaufft oder alienirt gnedigst wiederumb verholffenn, unnd donebenn denn freybeuterenn und seherauberenn mit geburlichem ernste nachgetrachtet, unnd dieselbige ihrer vorwirckung nach anderenn zum abscheu in geburliche straff genommen werdenn muchte. An welchem e. kun. maytt. allem friedlichem wesenn, auch handhabung der algemeynen sehefart, und commertien zu gutem, auß angeborner kuniglichenn miltigcheyt, gnedigst unnd veterlich erzeigenn werdenn. Das wirdt gott der almechtiger, e. kun. maytt. reichlich belonenn, unnd wyr seynd eß umb e. kun. mayt. underthenigstes fleißes jederzeyt zuvordienenn gantz bereid und willig, dieselb e. kun. maytt. hiemit gott dem almechtigen in kunniglichem wolstande, friedfertiger regierung, unnd frolicher leybeß gesundheit land zufristenn, unnd zuerhaltenn gantz trewlich empfelendt. Datum unther unser stadt secret denn 31ten decembris anno etc. 87.

E. kun. maytt.

Underthenigste unnd beraydtwilligste

Burgermeistere unnd rath der stadt Bremen.