Gestrenge, edle unnd ehrnveste herren, kün. maytt. zu Dennemarken verordente reichs räthe, bey hochstgedachter kün. maytt., meynem gnedigstenn herren, hatt ein erbar rath der stadt Bremen, mir underthenigst zu suchenn zu bitten, unnd anzuhalten befolenn, daß ihr kün. maytt., gnedigst woltenn geruhenn, auff etzliche haven in Ißlandt, die ihre burgere gegenn erlegung der geburnuß, bißanhero mit ihrenn schiffen, und wahren besucht, unnd besiegeltt, kün. concession, paßbrieff oder verschreybunge auff etzliche jare gnedigst zugeben unnd mitzutheylen alß, auff

1. Ostfortt inn Ostfort sußell, so erst Christoffer Meiger, nun aber etzliche jahr Marten Losekanne besiegelt,

2. Bodenstede inn Schnevelß sußell darauff Johann Hudeman nun lange jar seinen curss mit seinem schiff gehaltenn,

3. Flatto darauf Carstenn Bake seine sigillation gehabt, oder weyll dieselbe havinge, (wie sichs ansehen lest) anderen zubesiegelen noch gegeben¹, umb Neßwage, oder Sticksholm, oder auch Ellerohe in Schogeßstrandeß sußell, so nun von keinen anderenn besiegelt werdenn sollen, underthenigst zubitten,

4. Wattlose von sudenn darauff Johann Schroder sampt seinenn mit consorten ihre commercia ein zeytlang gehaltenn, unnd woferne dieselb, (wie man nicht hofft) numehr anderen vorliehnet, umb Grindewick, oder Inwage unter denn Stappen in Bredestede sußell, darauff inn zwantzig jahrenn kein schiff soll gelauffen seinn, underthenigst bittenn.

Unnd alß dann auch zu mehrer befurderung, sowoll der hochwurdigster durchleuchtiger, hochgeborner furst unnd herr, her Johan Adolff postulirter unnd erwolter zu ertz unnd bischoffenn der stiffter Bremen, unnd Lubeck, erbe in Norwegen alß ein erbar rath deßwegenn underthenigste intercession unnd furbitschrifft an die kun. maytt. zu Dennemarcken² gelangen laßen, so getroste ich mich underthenigst ihr. kun. maytt. auch den Bremischen burgerenn dieselbenn gnedigst unnd fruchtbarlich genießen laßen werden.

E. gest. herl. unnd g.

unterdienstwilliger

Daniel Bisterfeldt
Secretarius der stadt Bremen.