Instruction, weß ann die kun. matt. zu Dennemarckenn etc. ihrenn gnedigsten herenn, einn erbar raht der stadt Bremen, ihrem mitt rahts verwandtenn Henriche Bredelohenn, unndt secretario Henrico Houckenn unndterthenigst zuwerbenn aufferlecht, unndt befahlenn etc.

Annfengklich sollenn unnsere gesandtenn, negst geburlicher dancksagung gnedigst vorstateter audientz, ihrer kon. matt, unnsere unndterthenigste dienste bestes fleißes vermeldenn. Unndt danebenn i. kunn. matt. unterthenigst erinneren, welcher gestaldt i. kun. m. unndt derselbigenn hogst loblichenn vorfahrenn kunigliche gnedigste zuneigung, unndt, wellgewogenheitt gegen unnß, diese gute stadt, unndt gemeine burgerschafft wie je, unndt allewege unndterthenigst gespurett unndt befundenn, auch innsunderheitt mitt indeme, daß vonn i. kun. matt. unnsern burgern vonn vielenn unndt langen jahrenn hero nicht allein gnedigst concedieret, vergonnet, unndt zugelaßen worden, etzliche havinge inn ihrer kun. matt. lannde inn Ißlandt mitt ihrenn wahrenn zubesuchen unndt mitt denn inwoneren, derselbigenn landenn ihre gewerbe, commercia, hantierung unndt kauffmannschafft zu exercieren, zuubenn unndt zugebrauchenn, sondernn daß auch i. kun. matt. derenn etzlichenn auff sonderbare havingenn kunigliche begnadigung unndt paßbrieff, gnedigst gegebenn unndt zukommen laßenn hettenn. Deßenn dann gegenn ihre kun. matt. wyr unndt unnsere burgerschafft jeder zeitt inn schuldiger undterthenigkeitt unnß bedanckenn mußenn etc.

Unndt ob woll darauff dieselbige unnsere burgere, vast lange jahre unndt beinahe so weitt sich mennschenn gedenckenn erstreckenn mach, ihre kun. matt. undterthanen inn Ißlanndt, mitt ihrenn schiffen jahrlichs besucht, unndt dennselbigen ihre wahren als mehl, bier, unndt allerhandt andere nottrufft von proviandt, unndt sonstenn, derenn sie zu unterhaltung ihres leibs unndt lebendes bedurfftich, jahrliches so woll inn teurenn, alß annderen beßeren, unndt wollfielerenn jahrenn, beschaffet, unndt zugefuhrett, auch ihnen solche wahrenn nicht nach ihrenn (der unserenn) eignenn vortheill, und gutduncken, sondern nach des vogts, oder kuniglichen bevehlichabers daselbst angesatzem werht unndt anschlag, gegeben unndt zu kommen laßenn. Unndt dagegenn widderumb vonn ihnen, fisch, traen, butter, unndt der gleichenn wahr, so einn jeder gehatt, unndt auffgehegett, inn bezalung angenommen, und also ihrem wechsell, und umbschlag zu ihrer beidertheile nutz, unndt frommen, auch so woll zu der vorgemelten Ißlander, alß der unnsern, unndt ihrer beiderseids armen weib unndt kinder unterhaltung, undter guten glauben, unndt umb einen zimblichenn undt billichen werdt, gepflogen, unndt gehaltenn, unndt zu sothaner behueff einn zeittlang woll ann die achte haven inn Ißlandt, die sie auch anfangs mitt großer gefahr schiffs, leibs, undt gutts zum theill selbst auff gesucht, unndt auff gesigeldt gehatt, jahrliches beschiffett, und gegenn erlegung der kun. matt. geburenden zollennß ingehabt hettenn etc.

So hette doch folgendes daß unnglucke zu unnseren burgerenn sich leider geneigtt, also, daß vonn denenn kauffleutten etzliche, die mitt sonderbaren kuniglichenn concession, unndt begnadigung auff etzliche havenn gnedigst vorsehenn, unndt belehnet gewesen, mitt ihrenn schiffenn leib unndt guttern, auff der widder reise, wann sie alreits die Ißlander geproviandieret unndt, mitt nottrufft vorsorgett gehabtt, zur sehe weits geblieben, unndt viell betrubte wittwen undt weisenn, in großenn jammer, kummer, betrubnuß, unndt armutt hinter sich verlaßenn, deme dann etzliche unnsere burgerschafft mißgunstige nachgetruckt, unndt mitt ihrem ungleichenn bericht unndt furgebenn, alß wann niemandt mehr vonn denn selben unsern burgernn, oder deren mittverwandten rehderenn, so dieselben havingen vorthann besuchen konten, oder woltenn inn leben vorhanden (da doch die ubrigenn rehdere solche havingen zuverlaßen niemalß bedacht, dann viellmehr zu continuierung ihrer ublichen nahrung, auch einfurderung ihrer inn Ißlande ausstehende schulde, andere schiffe mitt allerhandt notturfft widder außzurusten, entschloßen unndt im wercke gewesenn) so viell erpracticierett, und zu wegen gebracht, daß sie bei i. kun. matt. auff solche havingen andere sonderbare vorschreibung erlangtt, unndt die unnsere damitt vonn allsolchen havingenn, zu ihrenn unverwindtlichen schadenn, unndt nachteill gentzlich außgeschloßenn, vorstoßenn, unndt verdrungenn, daß also nuhmehr etzliche weinige haven, vonn denn geringsten, auff die unnsere burgere ihre hantierung, gewerbe unndt kauffmanschafft treiben, denn unnsernn gelaßenn, unndt ubrig vorbliebenn.

Unter denenn die eine inn Ostfortt Sussell, Ostfordt oder Papie genanndt, die anfangs vor achtzig oder mehr jahrenn, vonn Berenndt Losekannen, unndt synenn myttvorwandtenn, auff habende kunigliche concession oder paßbrieffe¹ besiegeldt, unndt beschiffet wordenn. Deir dann auch i. kun. matt. alß im vorschienenn 76 jahre solcher paßbrieff durch deß schifferß vorwahrlosung,² etwas mangelß bekommen, dennselbenn auff Christoffer Meiger zu erneuweren,³ unndt denn unnsern solche ihre sigillation, auff unnser unndterthenigsts ansuchens, ferners zu confirmieren gnedigst geruhett etc.

Die ander havinge inn Bodenstede, die unnser burger Wylckenn Hudemann, sambt seinenn mittvorwandtenn, auch anfengklich anno etc. 26 gefunden unndt auffgesiegeldt, unndt hernacher ann deroselbigenn, gegenn erleggung deß kuniglichenn zollenns gerechtichkeitt etzliche viell jahre seinenn hanndell, gewerb, unndt umbschlag unngehinndertt exercieret, unndt getriebenn, biß anno etc. 62 etzliche Hamburger ihne selbmutig darann zu beeindrechtigen sich undterstandenn, unndt gelustenn laßenn. Deme aber ihre kunn. matt. zu der zeitt auff unterthenigst angebrachtenn bericht,⁴ einenn wandell gnedigst geschaffett, denn Hamburgerenn sich solcher havenn hennferner zuenthaltenn ernstlich mandieren unndt gebietenn laßenn, unndt die unnsere darauff zeitthero solche haven mitt gutenn ruhe besucht, unndt besiegeldt, unndt die innwohnere daselbst mitt gutenn unnstraffbarenn wahrenn, zu derselbigen großenn danck, unndt willenn, nottrufftiglich vorsehen unndt vorsorgett hettenn.

Die dritte Flattöh genanndt, so doch keine sonderbare havinge, dann alleinn einn kleinn abgelegenn ortt eines eillandts seinn soll, darauff die unnsere die vonn denn rehderenn, unndt schiffsfreundenn seligenn schiffers Johann Munstermans (der auff eine vornehme having die Kummerwage genandt kunnigliche concession, unndt begnadigung gehatt, unndt dieselbe negst seinenn vorfahrenn woll ann die hunndert jahr beschiffet, undt besigeldt, doch entlich vor achte jahrenn auff der herreise auß Eißlandt, mitt schiff, mann undt gute zur sehewert gebliebenn, darmitt domalß auch die vorgerurte kunigliche begnadigung vonn handen kommen, welcher gelegenheitt dann einn Jeverischer oder Oldenburger Jochim Kolling sich gebrauchett, unndt auff ungleichenn bericht, alß wann keine Bremische mehr, die solche haven besuchen wolten, im lebenn vorhandenn, so viell erhaltenn, daß ihme unndt seinen mittvorwandtenn solche havinge vorschrieben,⁵ unndt die unnsere darauß gentzlich vordrungenn wurdenn) uberig gebliebenn, undt keinenn anderen handell, alß die farht auff Ißlandt gelernet unndt zu treiben gewußt, einn neuwes schiff (alß sie durch undterthenigsts bittenn unndt suchenn Rulffs vonn Deventers ihrer kun. matt. zeugmeisters sohnß der mitt ihnen nebenn Carsten Bäkenn inn geselschafft getrettenn, hirauff ettwas willenn erlangtt⁶) mitt allerhandt inn Eißlandt dienlichenn wahrenn, zu großer ihrer gefahr unndt wachnuß, zugerustet, unndt seitther solcher zeitt ihre siegelationn, unndt handell gegen entrichtung der geburnuß dahinn exercieret unndt geubett hettenn etc.

Die vierte Wattloße inndt sudenn, so im gleichenn keine sonderbare having, dann einn geringer ordt eins sehstrandes seinn soll, dar auff unnser burger Johann Schroder, sambt seinenn mittconsortenn etzliche jahr ihr schiff zu lauffen laßen, unndt mitt denn inwonerenn des ortts, ublichenn Ißlandischenn gebrauche nach, contrahieret, unndt ihrenn umbschlag bißhero gehaltenn, undt denn geburlichenn zoll erglecht, unndt ihre wahrenn, unndt schulde auch daselbst im lande noch außstehende hettenn etc.

Wie dann auch auff Neßewage, vor westen inn der Hilligennfeldes Schwete gelegenn, unnsere burgere Everdt Hovemann, unndt seine mittconsorten mitt ihrem schiffe woll ann die siebentzehen jahr ihrenn curss continuieret, unndt gehaltenn, die leute deß ortts mitt allerhanndt commoditeten, unndt nottrufftigen wahrenn, unndt victualien vorsorgett, unndt davor, alß billich ih. kun. matt. bevehlichhabere die geburnuß erlecht, unndt endtrichtett, unndt sich woll gentzlich nicht vorsehenn, daß sie dar ann soltenn gehindert, undt beeindrechtiget seinn worden, wie ihnen gleichwoll, uber zuvorsicht widderfahrenn, alß sich leute gefundenn, die weilandt dem hochwirdigstenn, durchleuchtigsten hochgebornenn furstenn unndt hernn, hernn Heinrichen ertzbisschoffenn zu Bremen, administratorn der styfft Oßnaburch undt Paderborn hertzogenn zu Sachßenn Engern unndt Wesphalen unnsernn gewesenen gnedigsten fursten undt hernn, christmilster gedechtnuß, mitt unnwarhafftenn bericht, alß wenn die angeregte have Neßewage leddig were, unndt vonn keinen besiegeldt wordenn, eingenommen, unndt so viell zu wegenn gebracht, daß s. f. g. bei der kun. matt. umb concession unndt verschreibung auff berurte haven schrifftlich angesucht,⁷ unndt ob woll ihre k. matt. darinn, auch inn mehren darzu s. f. g. gnedigst gewilfahrett,⁸ so were dannoch ihnenn (Everde Hoveman) unndt synenn mittconsortenn, alß die zuvor allewege auff solche havenn geredt, dieselbe vorthan zubesiegelenn gestattet unndt zugelaßenn. Demnach sie verschienen jahres auch auffs neuwes nicht einn gerings dar auff widderumb verhengett, unndt einn mercklichs vann schuldenn unndt wahrenn, darunter auch noch mitt der fisch, denn sie vonn kon. matt. bevehlichabere kauffenn unndt annemen mußenn, deß ortts nocht auß unndt hinderstellich hettenn, zu welchem weiln die jetzmehrgerurte haven anderwerts widderumb vorlehnet,⁹ unndt sie darauß vordrungen wordenn, wann ihnenn nicht durch andere wege geholffenn werden soltenn, sie dadurch inn uberwyndtlichen schaden unndt nachteill ja auch endtlichem abbruch unndt undergang ihrer nahrung geratenn, unndt gesatzt werdenn soltenn. Alß sich dann die gedachte unnsere burgere, auß diesem unndt anderenn auch die vorsorge geschaffett, wie sie auch zum theill vorhandenn zu seinn weittleuffig berichtet, unndt inn erfahrung gekommen wehrenn, daß andere inn fleißigem arbeite seinn, unndt sich vast bemuhenn soltenn, damitt sie die unnseren vann denn angezogenen vonn i. k. matt. habenden noch ubrigenn havenn auch verdringenn, verstoßenn, unndt dieselbe ann unndt zu sich wennden muchtenn. Welches dann nicht allein ihnenn, alß die keiner anderen handlungen, vonn jugent auff byß inn ihr jetziges alter gewennet, darzu ihr gantzes vormugenn, auch allenn ihrenn vorrecht darinn gesteckett, unndt nach mitt schuldenn, unndt widderschulden mitt den Ißlanderenn selbst, damitt sie inn guter kundtschafft handell unndt wandell gestandenn, wann ihnen andere frembde, damitt sie niemalß zuvor gemeinschafft gehabtt, auffgedrungen werden soltenn zu großer beschwer unndt dann unns, unndt dieser guten gemeinde, alß derenn alreits, die vornembsten haven endtzogen, zu schaedtlichem vorffange unndt abbruck burgerlicher nahrung gedeienn, unndt gereichen wurde. Daß dannoch ihre kun. matt. unnsers undterthenigsten vertrauwens, undt hoffens eben so weinig unnß undt unnser burgerschafft (alß die wyr unnß jederzeitt gegenn ihre kun. matt. zum unterthenigstenn dienste unndt wyllfehtung zum bestenn beflißenn, wie auch noch darzu unnß unterthenigst erbietenn) alß ihre kun. matt. Ißlandischenn unterthanen gonnen werdenn.

Alß sollenn unnsere gesandtenn bey ihrer kun. matt. unndterthenigst sollicitierenn, pflehen, bitten unndt anhaltenn, daß ihre kun. matt. gnedigst mochten geruhenn, die obbenanten vier parthienn, bey angeregten habendenn haven, darauff sie einnßtheils mitt kuniglichen vorschreibung hiebevor vorsehenn, zum theill auch dieselbe vonn vielen jahren, gegenn erleggung der gebuer, besiegeldt gehabtt, gnedigst zu laßenn, alß auch anderenn unnseren burgerenn, so vonn ihrenn havingen vordungenn, unndt gleichwoll wie gemeldt, nicht anderß gelehrnet habenn, unndt sunstenn zum bettelstab vorweiset werden muchtenn ann nachfolgende ortte alß Styckingshölen oder Elleröhe inn Schogesstrandes Sußell, annstatt der havenn gleich anderenn mitt ihrenn wahrenn zu siegelenn, gnedigst zu verstattenn, unndt sie darauff mitt sonderbarenn kuniglichenn concession unndt paßbrievenn zuversehen unndt zubegnadenn.

Solches unndt alle kuniglichen gnaden thaten zu ihrer kun. matt. wir unns unterthenigst getroestenn, undt werenn es umb dieselben (die wir inn denn gnadenreichenn schutz, unndt schirm gotts deß almechtigenn zu langer frischer, unndt frolicher leibs gesundtheitt geluckseliger unndt friedlicher regierung, unndt allem kuniglichenn wollstandt gantz truwlichem empffelen) bestes unnsers fleißes, unndt vormugens unterthenigst zuverdienen jederzeitt gantz bereitt unndt willig.

Unndt deß zu mehr urkundt habenn wyr burgermeistere, unndt raht obbemeldt, unnser stadt secrett hirunter auffs spatium wißentlick getruckett. Nach christi unnsers herenn undt heylands geburdt im funffzehenhundert sechß unndt achtzigsten jahre am achtzehendenn tage des maents januarii etc.