Durchleuchtiger großmechtigster konig und hochgeborner furst, e. kon. w. seindt unsere freundtwillige dienste und waß wir der verwantnus nach^a liebs und guets vermugen zuvor, freundtlicher lieber her vetter und gefatter, e. kon. w. geben wir hiermitt freundtlich zuvernehmen, das wir nun etlicher jare hero befunden, mit waß schaden und nachteill in unser hoff- und haußhaltung die victualien an drogen vischwercke uber den billichen werdt eingekaufft worden.

Darum und dieweill wir deßhalben^b in unsern stifften und landen eine zimliche anzall haben mußen, seindt wir vurursachet ein eigen schiff zubestellen, so unß jerliches die nottrufft von den orten, da der visch gefangen wirtt, umb billichen wert zuzufuren.

Nun werden wir berichtet, das e. kon. w. ire haafen in Ißlandt, zusiegeln gewißen personen pflegen ein zuthuen, und denselben ire paßbrieffe daruber mit zutheilenn.

Wan wir dan jerlichs benants schiff in Ißlant, auf e. kon. wer. haafen das Reff genandt, von wesen^c undter dem Snevelß Jokele, belegen, gerne lauffen laßen wolten.

So bitten wir hirmit vetter- und freundtlich, e. kon. wer. wollen uns zubesondern angenemen gefallen, angeregte haafen, oder so dieselbe albereit außgethan wehre, eine andere, erlauben und einweiligen, und unß daruber ihren kon. paßbrieff bey zeigern zukommen lassenn.

Soll sich der schiffer dagege[!], dem gebrauche und gerechtigkeit solcher haafen, underthenigst gemeß erzeigen, und do wir es unsers wenigen vormugens, in der gleichen und sonsten umb e. kon. w. zuverdienen wusten, wolten wir insonders darzu bereidt sein, e. kon. w. hiemit den gnadenreichen schutz des hochsten, zu langweriger frolicher leibes gesundtheit und glucklich regyment bevelendt. Datum Vorde am 12 junii anno etc. 83.

Von gottes gnaden Hinrich postulirter ertzbischoff zu Bremen administrator der stiffter Oßnabrugk und Paderborn hertzog zu Sachssen Engernn unnd Westphalenh.