Hochgelerde ehrbahre und wolwyse grothgunstige gebedende heren, negst erbedinge unser gehorsahmen bereittwilligenn deinste, geven i. erb. w. wy, mit bedroveden gemohte, klagende deinstlick tho erkennenn, wowoll wy vor velenn jahrenn (unser nehringe mit darwaginge lyveß unde gohdeß thom bestenn nhathosettende) entlick dorch gnedige anwysinge deß almechtigenn, eine haven in Ißlandt, mit nhamen Bodenstede, thom ersten angedrapenn und up gefundenn, oick folgendeß desulven, up vorgahnde gnedigste verloffniße der kon. maytt. unseß gnedigsten herenn, unnde dersulven verordentenn vogdenn darsulvest, negest guthwilliger verrichtinge deß gebohrlickenn tollenß, jahrlikeß besegeldt unde mit allerley deinstlikenn wahrenn notturfftiglick vorsorget, so datt unseß underdenigstenn verhapendeß, de hogstgedachte kon. maytt. unnde dersulvigenn bevehlhebbere unde underdahne, sick derwegenn unser (godt loff) inn nichtem tho beklagen hebbenn werdenn, wy oick desulvige nhu mehr aver de vertich jahr ahne jemandeß insper unde verhinderinge, also rouwlick gebruckett unde besegeldt.

Dat doch dessenn allenn unangesehenn, dißeß jahreß etlicke borger van Hamborch, alse schipper Jurgen Borcherß sambt synenn koepluden, sick tho unß in bemelte havenn mit ohreme schepe unde guhderen dedtlick gedrungenn unde unß mit unser wahre, de wy mit grother beschweringe in dissenn duhrenn jahrenn up unde dahr gebracht, fast tho achterenn gesettet.

Alleß inn meinung, unß oick der einigen have, deren se sick doch vor dißer tydt nyehmahlß an genhamen, gelyck den anderen havenn inn Ißlandt (darin se vor unde nha tho nichtt geringer disser guhdenn statt beschweringe unde affbroke gemeyner nehringe sick gedrungenn) dedtliken thoendtsettenn.

Dewyle averst solcke vorhinderinge und affstrickinge unser nehringe nicht alleine der nhaberlikenn verwanthenisse, sundern oick der christliken leve, dehme rechtenn unde aller billicheidt tho wedderenn, unnde wy der mehr gedachtenn havenn uns beth darher nicht geutert, unß oick desulve dorch der hogstgemelter kon. maytt. bevelhebber nicht up gesecht wurdenn.

Wylen tho der kon. maytt. wy unß underdenigst vertrosten, desulvige werdenn gnedigst geruhen, unß wedder Jurgenn Borcherß unde syner verwandtenn dedtlike handelinge, nicht weiniger by bavenberohreder havenn thoverbiddenn, alse he verschenenn jahreß van einer anderen have, de Kummerwage genohmett (daruth he etlike unse mede borger gelyker gestalt thodrengen sick underfangenn), van ohrer kon. maytt. ernstlick affgewysett wurdenn.²

Ist demenha unse deinstlike bede i. ehrb. w. sick gunstiglick nicht beschwerenn willenn, unß by hogstgedachter kon. maytt. vorbitlick thoverschrivenn, darmede wy verdan, by mehrberohrder havenn, ahne einige der Hamborger beeindrenginge umme de billike gebohr, beth so lange ohre kon. maytt. solcke havenn vor sick sulvest besegelen tholahtenn, nicht enschlatenn, gnedigst gelahtenn, unde fredlick blivenn mogenn.

Solckeß gereckett nicht alleine de wy unser gelegenheidt nha solcker schipfahrtt unß ernehrenn mohtenn, sunder oick gemeiner stadt unde borgerschop, so vann denn Hamborgerenn derorder (wo gemeldt), fast verdrungenn, thom bestenn, unde wy sindt id umme de kon. maytt. in aller underdehnicheidt, oick i. ehrb. w. in schuldigem gehorsahm utersteß vormogendeß thoverdehnenn gantzwillich. Datum Bremenn, denn XXVIIIen augusti anno etc. LXIIII.

I. erb. w.

Gehorsahme und bereitwillige borgere

Samptlike schipper unde koeplude der haven Bodenstede in Ißlandt

An den rath tho Bremenn.