Cristiern van gots gnaden to Dennemarken vnde Sweden gekorn konnynk recht erue to Norwegen, hertoch to Slesewich oc to Holsten etc.

Ersamen leuen besundern vor vns vnd vnsen leuen getruwen rikes Norwegen reden hebben vnse vndersaten van Bergen ok desgeliken de gemene Dutsche copman darsuluest residerende vnd Bergerfare vth den Wendesschen steden laten berichten klagende, wo dat bauen olde gewonheit de van Hamborch Bremen vnde andere coplude vth den Wendesschen steden nw nygelinges bynnen etliken korten jaren sik angenamen to segelen na Ysland, vnd strax wedderumme van dar den Yslendesschen fisch vnd andere ware darsuluest fallende to Hamborch vnde andere wegen ostwardt foren vnd bringen de wile denne sodane vorgenamen nyge segelatien nicht alleyne genanten vnszem rike Norwegen vnde jngeseten dessuluen to merckliken groten schaden nadeile vnde vordarffe is dann ock to affbroke vnd tegen priuilegia vnnszer vndersaten to Bergen ok Dudesschen copman nw dar residerende vnd der Bergerfarere gelangende. Als is derhaluen vns dat also togedulden vnde tostaden gar nicht donlick worumme begeren wij jn gutliken flite vnd ok ernstlick willen vorberorde gelegenheit vnde dat gemene beste mede angesteen, gy samptlik vnd jntbesundere mit dem besten dar vor[...]gen vnd vorschaffen desuluen vorbemelte nygehe segelatien vnde reise affgestelt werde vnde ok jn sunderheit gar nicht gestaden de dorch jemande der juwen vnde andere togebruken, dan holden wo vnde alse van oldinges here gewesen van Yslandt na Engelant to segelende. Des geschuth hiranne also vnse ernste meninge vnd darmen des nicht also gestdigt vnd jemandt schaden dare auere nemende wurde, gedenckenn wy alsedenne darto nicht toantwerden. Datum Nikopinge am ffridage negest na sancti Laurentij martiris anno etc. xvc vnd jm drutteynden vnder vnsem signete.