Wy Bürgermeistere vnde Radtmanne der Stadt Lübeck, vnde andere Gemeyner Anse-Stedere Rades-Sendeboden, darsuluest to dage vorgaddert, entbeden juw Ersamen vnde vorsichtigen Olderluden, des Copmanns Dudescher Ansze to Bergen in Norwegen residerende, vnd dem gemeynen Copmanne darsuluest, sämptlich vnde sunderlich vnsen gunstigen willen, fruntlichen Gruth vnde alles gudt. Ersamen und vorsichtigen, besunderen gunstigen guden Frunde; Wy hebben van juwen Gesanten des Cunthors to Bergen, vele unde mennigerleye merkliche Gebreke, vnde vornemlich deme groten Ungehorsam vnde wedderwerticheit, sunderlinx der ampt kegen de Olderlude, dorch ore flitige Muntliche werffinge ock auergegeuen Schrifften genochsam vormerket,1 unde wo wol wy gantzes wyllens geneget gewesen, up solliche gebreke unde besweringe des guden Cunthors alhyr entlick to sluten, ock dergestalt, dat eyn yder mochte hebben touormerken gehat, dat wy denn Vorderff dessuluigen ungerne wolden, sunder so vele möglich tovorhoden gewilget weren, dennoch so syn wy bauen sollichen vnsen guden willen vnde vorsaeth, dorch gantz mennichfoldige anfallende treffliche Sachen unde Gescheffte, daran der gemenen Wolffart upt hogeste gelegen, der maten vorhindert worden, dat sollichs to desser tydt nicht hefft geschen konnen edder mogen, dar myt auerst noch vnse vorgewante flyth und sorchfoldicheit vor dat gude Cunthor gesport werden moge, hebben wy vns myt vorgandem rypem Rade eyndrechtliken entslaten, ock bewillget unde beleuet, dat Juwe Ersamheit unde gemeyne Copmann by dem, was betherto van den Erbern gemeynen Ansze-Steden deme guden Cunthor tom besten, unde to vnderholdinge dessuluigen geordinert, vorramet vnde berecesset, ock vorsegelt unde vorbreuet blyuen, vnde sick darna regularen scholen, beth to unser allenthaluen negester unde ryplicher Vorgaderinge, by Pene und Straffe in den Recessen der Steder darauer gemaket begrepen, uthgenamen de segelation in Iszlande, Hytlande, vnde fero,2 dar mede eth vorthan, als vor teyn offt twelff Jar her geschen,3 schal geholden werden, beth tho unser negesten tohopekumpst, vnd ist derhaluen vnse ernstliche Menynge unde Beuell, Juwe Ersamheit samptlich unde sunderlich sollich vnse Entsluth, Aueschet unde Bewillinge annemen, unde demsuluigen wo billich nachleuen unde geborliche folge don, beth so lange derwegen etwas anders van uns vnde gemenen Steden wert geslaten, unde insunderheyt, dat jy de Olderlude eyn flitich vnde geborlich upseen hebben, als juwe Ersameheit ores Amptes haluen schuldich, dar myt solliche angesatte unde bewilligede Ordinantie unde vorrame der Steder vormoge der Recesse, ock dersuluen vthgegeuen Zegele unde Breue, der gebor underholden werden, to welker behoff wy Juwen Ersamhiden, ock hyr myt Last unde Beuell geuen, de Schuldigen unde Ungehorsamen myt geborenden upgesatten Penen und Straffen, den eynen so wol als den andern, to achterfolgen vnd to straffen, nemantz darinne to uorschonen, dan so vns Jwer Ersz. W. Vorsumenisse vnde Nachlesicheit haluen hyr namals Clachte by quemen, willen wy sollichs by Juwen Ersz. vermoge der Recesse wegen to erhalen. Willen vns dennoch to juwen Ersamheiden vnde einem yderen vorsehn, de werden sick, in betrachtinge des Cunthors vnde ock siner egenen Wolffart, dessen vnsern wolmenigen ernstlichen beuele, als de Redelichen vnde Gehorsamen der billigkeit nachkamen, dar myt der Straffe ane Noth syn dorffe, sunst werden wy ferner dar to vordacht wesen, wo sick dan der noturfft na wil geboren, also dat de Schuldige vnd Ungehorsame myt vordender Pene nicht schal vngestraffet blyuen, wy hebben ock myt den Erbarn Steden dat Cunthor to Bergen brukende, van der segelation be norden Bergen in drunten beredinge gehat, vnde befynden, desuluigen nicht vnwillich eyn yder Stadt by den oren also to uorfügen, dat solliche vmbehorliche Zegelation hinfurder vorblyuen schole, jodoch dat desuluen in deme gebruke der Priuilegien nicht mer als andere vorhindert, noch dar bawen beszwert werden mogen, welcke alle wy Juw also im besten nicht hebben willen bergen, vmme Juw samptlich vnd sunderlich dar na to richten, dan Juw vnde gemeynen Copmann gunstigen willen, vnde alles, wes to Wolffart vnde gedye des guden Cunthors gereken moge, to ertogen, syn wy alle wege gewilliget, des to merer Orkunde, hebben wy Rades-Sendeboden der Erberen Steden alhyr versammlet, vor vns, vnd im Namen aller anderen, neffenst den Ersamen unsern Frunden van Lübeck, myt oren anhangenden Secretsegell, des wy anderen vp dythmall hyr to gebruken, dessen vnsen apenen Breff wytlichen don vorsegelen. Gegeuen vnde schreuen bynnen Lübeck, Mandages negew na Johannis Baptiste Decollationis, An. 1535.