Ahnn die Stadt Brehmen.

Friderichsb[org] 13. t. Septemb. A^o 64.

Wir haben ewer schreibenn vnderm dato den 2. diss Monats heutt empfangen.¹ vnd Inhaltz vorlesen lassen. vermerken daraus. wess Ihr euch etzlichen vnuorsehentlichen beschwerungen halben. so ewern schieffen vnd Kauffleudten die vnser landt Jsslanndt besuchen. In der hafen Bodenstede genhant. vonn Schiffer Georgen Borchorst vnnd anderenn seinen mitvorwanten begegent sein sollenn. beklagen thut. Nur wir vnnss dan gutter massen woll erynneren. dass wir denen von Hamburgk. vnser Landt Jsslandt zubesuchen. hiebeuor fast gentzlich verbotten.² vrsachet vns diese geschichten. jegen das jennige. so wieder vnser verordnung von denselbigen furgenohmen. geburlichs einsehen zu haben. Wollen derwegen die Verordnung zu thuen wissen. das Jr euch wie wir vns vorsehen. des orts von denselbigen keines tedtlichen vberfals mehr zubefharen haben sollet. Wir gonnen euch auch. das Jhr gemeldte hafen Bodenstede fort ahn. wie bis daher. ohne Jemandts hinderung besuchen muget. so lange. das wir nach besser erkundigter gelegenheit desfals ein anderss vorordener werden. das werden sich auch die ewern daselbst. Jhrem erbieten zu folge. mit der erlegung des Zollens vnd anderer gebur vnuorweisslich erzeigenn. Vnd wolten euch diess zu gnedigsten Anntwordt hinuieder nicht verhalten. Seind euch mitt gnaden bewogen.