Ahnn Doctor Hinck.

Friderichsburg. 13. Septemb. A^o 64.

Ewer vorbitlich schreiben vor etzliche Burger zu Brehmen so nach vnsern Lande Isslandth handeln. vnd sich Jhnen vor etzlichen von Hamburgk jnn der hafen Bodenstede beschehenen eintrags. beschweret. vnnd abschaffung gesucht. haben wir neben eines Radts daselbst derwegen auch ahn vns erganngner vorschrifft¹ heutt dato entpfangen. vnd gnedigst vorstanden. Vnd weill wir denen von Hamburgk. gemeldts vnser Land Isslandt hiebeuor. fast gentzlich verbotten.² dem zu jegen solcher eindranck wieder faren sein mus. vns zu verordenung. das sich ermeldte vonn Brehmen dergleichen vberfals hinfurder nicht zubefharen habenn solten. gnedigst erbotten. auch zugelassen. das dieselbige. bis das wir vnns allerley gelegenheit besser erkundiget auff geburliche erzeigung. Jhrem erbieten nach wie biss daher besuchenn vnd gebrauchen muegen. Alles Jnnhalts vnsers ahn den Radt daselbst wieder ergangenen Antwordt schreibens.³ Welches Jhr vngezweifelt vonn Jhnen selbst werdet zustehen erlangen. Kondten dissmals weiter jnn diesen sachen nichts einreumen.

Seindt euch zu gnaden geneigt.