Unsen fruntlicke deinst bevorenn, gestrenge ernveste unnd erbar gunstige gude frundt, wy hebbenn ir. gheit. schrivendt belangende de Ißlandeß farer so ohre neringe up de havenn Kummerwage unnd Bodenstede sokenn, entfangen unnd verlesen, ock unsen borgerenn vorgeholdenn, weß nu desulvenn sick thom hochsten deßhalvenn jegen uns beclaget, hebbe gy uth byvorwareder affschrifft ohrer dupplication¹ gunstichlick tho ersehende, und mogenn i. g. ferner nicht bergenn, dat wy solckenn der unsenn bericht, neffens unsenn verbitlicken schrifften an de kon. maytt. tho Dennemarcken² unsenn gnedigsten hernn underdenigst gelangen laten. Der trostlicken thovorsicht ohre kon. maytt. werdenn de unse nicht alleine der haven unverschuldeter sachenn nicht entsetten, sundernn darby vor menniglickes beindregtigung (wo den ock vorschenen jareß jegen de Hamborger gescheenn, des wy unns underdenigest don bedancken gnedig schuttenn unnd handthaven, unnd biddenn demenha frundtlick i. g. inn dissem der unsenn beste wetenn, unnd moglickes flites, by hochstgedachter kon. matt. tho Dennemarckenn besonderenn helpenn willenn, dat de unse upgemelder havenn, also unvorschuldter wiße entsettet werdenn mogenn. In betrachtinge dat se wann denn Hamborgernn, vast uth allenn Islandeschen havenn vorlangest gedrungenn wurdenn, unnd sick mit nicht geringer unkoßt, alberede up de rese gerustett, dat willenn wy unns tho ir. gr. der billicheit na gentzlick verstehenn unnd sindt der sulven frunndtlicke denste henwedder thobewisenn urbodich. Datum under unser stadt secrett, denn 31en martii anno etc. 66.

Borgermeistere und radtmanne der stat Bremen.