Der samende koplude korte erinnerunge wegen eres avergegevenen instrumentes an einem e. h. unde w. radth.

Erntveste erbare hoch unde wolwise grodtgunstige heren.

1. Alse de koplude der Hanenforde vornemen, der Kibbelwiker ankumpst alhir tho Hamborch, sin 2 unsers middels alse Dirick Bheerman unde Thomas Meier, an Christoffer Meklenborch unde Hinrick Ordth koplude uth Kiblewigk geghan, enen angemeldet dat wi alse de koplude uth der Hanenforde begereden unsere rhum in erem schipe tho besehende namiddach, darup se geantwerdet dat se sulckes erem schipperen wolden anthoegen de scholde mit uns faren uns datsulvige sehen lathen, welckes den geschein also dat de schipper unde sin hoevetboßman sin mit uns under eins in ere schip gefaren, ock so is aldhar im schepe gewesen, Cordt Weimeiers soene Hinrick Wemeier wan 25 offte mher jaren noch Hans van Hutlen steeffsoene Henrick Rode von 30 jaren, dat also 4 levendige personen erent halven aldhar in der besichtunge gewesen sin. Unsere instrumente is 3 dage older alse unsers jegendeils, in beslatener have kan men vele verhumes baven setten, dat men aver sehe varende nicht dhon kan. Derhalven is erer instrumente vordechtich, unsere bede is an i. e. w. umme unsere getugen thor vorhor tho lathen.

2. Unsere jegendeill de Kibbelwickere sin den 10 edder den 11 junii thor have in Ißlandt gekamen, hebben den 27 junii angefangen inthoschepende ere gudth also 70 last, beth an den 22 julii wolden unsere 50 last in etlike stunden innemen, is ock nicht tho bewisende, dat jennich schipper hefft so with buten gelegen umme gudt inthonemende, alse se bi uns legen, unde hebben men 30 stunde stille gelegen aldhar, quemen den 1 augusti, do wi segelrede weren, hebben ock unsere schip alse Jochim Hare sin haven aver gebeden unde also belemmert gehadth dat wi up grote gefhar darmit fhoeren, hedde uns ein sthorm edder unwedder bedrapen, so muste wi hebben gudth geworpen wy kunden ock nicht undere stucke bruken, dewile unsere bheer unde vittallie ock ander gudth baven bi dat geschutte gestowet was.

Dewile unsere jegendeill de Kibbelwikere keine fullenkamen fulmacht hebben mit uns up der Hanenforde segelende tho vorenigende, dewile Hans van Hutlen ock Gyse Kopmann nicht jegenwerdich sin, wo se sick sulckes jegen de heren commissarii gisteriges dages sulvest vornhemen lethen unde datsulvige dorch disse gudtliche handelunge nicht vordragen is, so referere wi uns tho dem sehrechte, was uns datsulvige werdt erstes dages erkennen, deme wille wi volgen, denne unsere frundtlike unde underdenige bede is an i. e. w. dat wi muchten gentzlich van einen der gesettet werden, denne disse sake is ein sehandel unde eine befrachtunge, wi sint borger alhir, begeren derhalven dat borger recht tho genetende. Begeren derhalven ein erbhar hochwiss radth wille de vorsehunge dhonn, dat uns keine gewaldt edder unrecht werde upgelecht, wi vor unsere aller personen begeren anders nicht, den frede hadden ock der mit befrachtunge gerne in vorleden vorjhar vorhaven gewest, wo sulckes den erntvesten unde wolwisen heren h. Erick van der Fechten ock heren Vincent Pollmen burgermeisteren, ock heren Sebastian van Bergen, rathvorwanten bekandt is, wes also ein sehrecht ock de beiden heren burgermeistern mit heren Sebastiano van Bergen werden uns raden deme wille wi alse sulckes kan mit dem fogligsten geschein gehorsamblich nakomen, up dat alle processe under ein dack gesperret unde thosamende alles upgehaven werden moegen.

Disse kleine erinneringe unde underdenige bede an i. e. w. gesehuth unkost ock vorbitterunge tho vormiden vorsehen uns ock ein erbhar hoch radth werde unsere bede geweren, was uns van rechtes wegen geboerende sin werdt, wille wi alse gehorsame borger folgen. Hirmit i. e. w. dem almechtigen bevolen, den [...]¹ aprilis anno 603.

De semptliken koplude unde uthredere der haven Hanenforde, borgere in Hamborch.

On a separate leaflet (f. 15)

Willen de Kibbelwiker sick erem liffliken ede erholden dat se ock ere volck unsere rhum nicht gebruket ock kheine hinderlist edder egenutz gebruket hebben in deme se so spade sin tho uns gekomen. So wille wi dhon wes ein erbhar radth uns werdt tho erkennen.