Den Hanenforer belangen.

Erntveste, hochgelerde, erbhare, hoch unde wolwise grodtgunstige herenn, dewile Cordt Wemeier Hans van Hutlen et consortes, uns, alse de semptliken koplude der haven Hanenforde, wegen etlikes frachtgeldes hebben gerichtlich laten bespreken, ock i. e. w. darinne ein ordell gevellet, wo wy de gantze fracht der 750 m Lubsch, scholden tho deponerende schuldich synn, jedoch affgekortet 6 last, sulckes moeten wy uns mit geduldt laten gefallen, dat averst i. e. w. gespraken ordell, ludet, na des geldes deposition schoele vermer na vullenforden bewyse unde affgeforter beider partien nottrofft eighan wes recht sin werdt, sulckes late wi uns gefallenn, denne wi begeren anders nicht, sunder wes christlich erlich unde recht is, ock dat de warhafftige grundt, in disser sake moege an den dach komen, tho dem behoff is uns worden vorgunnet, dat der Kibbelwyker schriveine alse Petur Sthalman muchte arresteret werden, ock dorch de heren gerichtsvorwalter fridtlich affgefoeret werdenn, up sine gedane erklarunge unde bericht, begerede wi, dat sin schriveine bock muchte den heren gerichts vorwalteren thogestellet werdenn, effte wi nu sulckes hebben koenen erlangen, werden de heren gerichts vorwaltere i. e. w. relation darvon dhonn koenen, schoelen bewise affgehoeret unde beider partien notrofft in acht genamen werden, unde de warheit an den dach kamen so moete wi weten wo vele gudt in alles in erem schepe gewesen sy, alse denne schal men wilt godt sehenn welcker instrumente dat warhafftigste is, dat kann ane des schriveine warhafftich avergegevene bock ock ane der koplude schrifft darby, wes se hebben gelevert, nicht geschein, wo kann enen dutsulvige werden tho betruwet, maken sick de Kibbelwikere also ein groth vordacht, dat se datsulvige bock bi sich holden, unde den heren gerichts vorwalteren nicht van dem schriveine sulvest in de hende gelevert is, denne erer etlike hebben gewisse unde warhafftich avergeschepet, wi willens mit godtlicher hulfe bewisenn, darumme ilen unde driven se de Kibbelwikere unde hebben also i. e. w. darhenne vormocht dat uns dorch dem heren protonotario scholde angemeldet werdenn, dat in unserm affwesen, de mit der sake tho vorfarende scholde vorgenamen werden, ock so verne wi nicht dorch einen fulmechtigen worden lathen antwerden, so worden dat sulvige geldt de gantze summa den Kibbelwikeren, gevolget werden, doch up caution, ock wo wi caveren scholdenn, wes also hirinne gerichtlich worde in unserm abwesende, erkandt werden, dat wi uns datsulvige scholden gevallen lathenn, welckes wi thuar nicht koenen annemen unde dat geldt welckes noch unsere is nicht so van uns dhonn werden, wi sint godt loff borgere unde ingesetene alhir, jo so pantbhar alse se de Kibbelwikere, wi sint godt loff keine mancipia sunder uns gehoeret jo so wol dat borgerrecht tho genetende gelick vornemen personen. Iß derowegen unsere underdenige unde dienstlike bede an i. e. w., i e. w. wolden dut behertzigen unde bedencken wo kan des erbaren rades ordel genoch geschein wo kann bewise gefoeret unde unseren notrofft gewaret unde i. e. wissheiden vorgedragen werdenn in unserm affwesende, dewile men na klage unde antwordth richtet, wo koenen wy unde de Kibbelwiker van einander gesettet werden ane richtlige reknunge wat vorsteidt sich ein juriste up fisch baggen, up hoevetfisch, up talfisch, up soltfisch, wes ein ider deell vor rhum vordert, dat eine is grodt dat ander klein, item wo men der koplude unde der knechte gudere, des schipperen unde des schepesvolckes gudt, ock ere voeringe, ock wes wi hebben darinne gehadt distingueren, recht warderen unde reken schall, wil men na unserm jegendele ingevent allene richten unde ein endtordell vellenn, des hefft ein erbhar hoch. radth wol macht, wi vorhapen uns averst ein erbhar h. radth werden hirinne uns nicht mit einem slutigem ordell averstellen, iß derowegen erntveste e. h. unde w. grodtgunstige heren unsere underdenige unde dienstlike bede, dat, dat geldt so lange in depositu ungeluchtet bi uns blifft, beth dat wi sint entlich deger unde gantz van einander gescheden wi van se, unde se van unß, entwedder dorch ordell unde bewise, edder dat disse sake den sefarenden olden werde vorgeschaven werden, edder sunst dath gutliche gedrhandlung vordragenn dewile idt eine sehandell is unde wegen rechtes uns nicht kan geweiert werden der sefarenden olden bedenckent unde ordell affthohoerende, ock dewile wi mit godts hulpe, unserer vocation unde neringe na, van huß moeten, dat disser sake ein aristandt gegunnet werde, beth dat wi mit leve unsere reyse affgelecht hebben godt geve mit leve, darmit averst i. e. w. sehen schoelen dat wi nicht willen unbillich handelen so erbede wi uns geborlike rente van deme tho gevende, wes enen darvan konde edder muchte thokamen beth uthdracht der sake, ock licht offte mher geldes in depositu lham unde fruchtloß, alse disse summa is, dar idt doch noch unsere geldere sin, wy hebben ock erert wegen einen erliken summen moethen vorleggen unde vorspilden, welckes i. e. w. willen ock in acht nemen, begeren derhalven dat ein e. h. r. uns unsere bede wil geweren, hiranne geschudth der billicheit unde dem naburlichem rechte gemete sin ock sulckes mit unseren underdenigen diensten na gebhore, unde in borgerlikem gehorsamb tho yderertydt so wol willich unde schuldich. Den 5 maii anno 603. in Hamborch.

I. e. w. gehorsame borgere de semptliken koplude der haven Hanenforde.