Myn frundtlich gruidth mytt begeringe alles gudenn vorne. Ernuesthe vnd erbar beszondere leue Esschell. Ick wyll juw guder wolmeyninge vnangethogett nicht lathen wo koniglige maiestatt tho Dennemargkenn M gte H vmme vele mannichfoldiger getruwer densthe wyllen szo de werdige vnd achtbare Thomas Koppen wandages konigliger maiestatt dudissche secreter vnnd jtzundes borger der stadth Hamborch hoichberompthen konigliger Maiestatt vnnd den rykenn Dennemargken vnnd Norwegen guidtwilligen bewyszett vnnd noich gern wyder ju erfaringe veelfoldiger kundthschopp (wor tho koniglige maiestatt szyner noich daglich gebrukett) bewyszen vnnd erthogen wyll denn suluigen Thomas mytt seinem koniglige maiestatt lande Fero gunstigen vnnd gnedigen belenett heffth. Vnnd genampthe Thomas my byddendtlich angefallenn denn suluigen vmme guder furderinge wyllenn gunstigenn an juw thouorschriuende des ick ohne mytt gefugenn nicht wuisthe tho weygerende. Js darumme tho juw myn frundtlich beger gy vppgedachtenn Thomas szyne vele vnd gertuwen densthe szo he koniglige maiestatt vnnd den rycken szo offthmales bewyszett beherthigenn vnnd vor ogen hebben willen vnd genanthen Thomas he szodane bauenangethogede landth¹ vmbewornn durch de szynenn beszytthenn vnnd gebrukenn moge my tho szunderlichenn dancknhemigen gefallenn gunstige furderunge erthogenn ohme ock dar jnne keynen hynder jmpasz ader bewor donn ader donn lathenn wyllen. Dar jnne juw my tho wyllenn gedachtenn Thomas guidthgunstich bewyszenn vnnd flytich vorschaffenn jck hyr nhamales erfarenn moge he dusszer myner vorschriffthen baidtlich furdelich vnnd fruichtberich by juw genathenn moge hebben szy ick nach hogesthenn vormoge vmme juw (gade wylfarich beualenn) thouordenende vnnd frundtlichenn tho vorschuldende gentzlich gewilligett. Datum jlendes Stheenborch am dage cathedre Petrj anno etc. xxx.

Johan Rantzouw rytther vnd holsthenissche hoiffmeysther.