15591212BRE00

1559, December 12

[Bremen]

Gerdt Hemeling to Bremen: defense against the complaint of Gerdt Breker's lawyer Didrick van Minden in the case about the death of his brother Cordt Hemeling on Shetland, in which he states that the witnesses contradict each other about what happened in Shetland, and that there is no alternative explanation for the cause of death of Hemeling than that he died from the blow dealt to him by Breker. Moreover, Breker confessed before Shetland governour Olave Sinclair, of whom he sends a letter of testimony, and demands that Breker pays the desired amount.

Created for and published on the HANSdoc website of the German Maritime Museum, Bremerhaven, by Bart Holterman in the context of the research project Between the North Sea and the Norwegian Sea: interdisciplinary Studies of the Hanse. Licensed CC BY.

Bremen, Staatsarchiv der Freien und Hansestadt Bremen

2-R.11.kk. (Akten der Hitlandfahrer)

One bifolio

21,5x30,5cm

Paper

Final version

Low German

On the back: Productum den 12 decembris anno etc. 59. Terminus 8 dage.

15591212BRE00SAB0

English summary of the lawsuit in Shetland documents 1195-1579, no. 110, pp.73-74.

Exceptio contra dicta testium et in eventum conclusio Gerdt Hemelinges contra procuratorem Gerdt Brekers.

Vor ju erbarnn vorsichtigenn hoichwisen hernn borgermesternn unnd radtmannenn der widtberomptenn stadt Bremen erschine ich Gerdt Hemelingk gehorsamlich wedder unnd jegenn Diderich vonn Minden, procuratorn Gerdt Breckers unnd sette unnd segge wedder syne vormeinte tuchenisse dat desulvige wedder unnd bavenn eine helle unnd klare transaction so tusschen my unnd Gerdt Brecker mynes zeligen erslagene broders halven upgerichtet unnd dat desulvige nicht stadt hebbenn moge uth orsachen wo nachfolget.

Unnd erstlich dewill inn rechtenn vorsehenn dat tugenn so tho tuchenisse boforderth de positiones darup se vorhorth werden enihelich botugenn schollenn, dewill dann dusse tugenn inn orer uthsage strituch unnd mangelhafftich bofunden wo inn orer uthsage tho ersehende mach derwegenn de producente darmit tho rechte nichts wercken.

Unnd off woll itlige tugenn deponeren als hedde de schipper mynn zelige broder nha den entfangenen slegenn ghegan unnd in der bodenn up dem lande gewesen, so hebbenn se dennoch nicht seggenn off tugenn konenn dat mynn zelige broder vonn anderer kranckhen als vonn den slegenn sinen dothligenn affganck hebbe genamenn.

Unnd wor nun de producente sich up synenn overgevenen sostenn bewiƟ artikell wordhe vorlatenn, unnd mich der tugen uthsaghe als were mynn zelige broder nicht von den slegen dann vonn anderer kranckheit gestorvenn genochsame bowisunge tho doinde vorhebbens, sette unnd segge darjegenn dat up solchenn artikell mich der tugenn uthsage gar nichts erwesenn, dann idt secht Hermen Schroder mynn zelige broder hebbe umme wedaghe des hertenn, unnd Diderich Snelle secht he umme wedage der syden geclaget hebbe, dewill se dann up denn artikell discordes is onenn derhalvenn nicht thogeloven.

Unnd wo dem alle hoichwise unnd gebedende hernn idt hebbenn i. e. w. uth hogenn vorstande uth vorigen von Johan Belinge, Brun Oldenborg inkamenen Gerdt Breckers ghegevenen schrifften gunstichlich tho ersehende, dat Brecker der daeth unnd dotslages gestendich unnd einen grothenn anthall guder framer lude umme gades willenn gebedenn se der transaction unnd vordrages indechtich wolden wesenn, wo solchs imfall der nottrufft dorch in gemelter transaction specificerte menne genochsam thoerwisenn des ick my tho doinde will vorbeholden hebbenn.

Darmit dann i. e. w. de helle warheit dat Gerdt Breker mynen zeligenn broder denn dotslach gedann unnd darvor nicht my allene dan der overicheit inn Hidtlandt affdracht gedann unnd gemacketh ersporen mogenn, so overgeve ick hir bivorwardt einn certification1 von dem oversten vageth unnd regenten des Hithlandes vorsegelt sampt denn vorschrivingen2 so gemelthe Breker Brun Oldenborch, Johann Beling, Oltman Iken, Hermen Middendorp unnd Johann Ellebracht ghegeven uth welchen i. e. w. sich lichtlich tho borichten wethenn.

Unnd dewill dann Breker mynenn zeligen broder vorwundeth, wor von he den doth genamen, wo vor he ock affdracht gemaket, wo solchs dem vagede unnd volen ingeseten des Hidtlandes ennich unnd apenbar, so genochsam dargedann unnd erwesen, will ick my tho rechte vorsehen, dat der vermeinten tugen uthsage darjegen nicht hefften mogen, dewill ock de tugenn alle suspect nachdem se mith in flockenn unde ferde gewesenn, dar mynn zelige broder ummegekamen.

Bidde derhalvenn i. e. w. uth upangetagenen orsachenn inn recht sprekenn unnderkennen willenn dat vilgemelte Brecker sine borgenn tho bonemende der transaction full tho doinde unnd wes he sich vorschreiven unnd vorborgeth mynes zeligen broders Cordt Hemelinges nagelatene wedewen unnd kindern vonn rechts wegen thotostellen sy schuldich, unnd dat solchs hillich unnd recht sy, wyll ick tho i. e. w. richtlicher erkentenisse gestellet ock i. e. w. hoichedelich milde richterlich ampt my hir inne mitthodelenn hogestes flites angeropenn hebbenn.

Salvis ulterioribus.

Transcript by Bart Holterman, 2017