Item des bekenne ick Gerth Brecker vor mi unnde mine erven unde vor alles weme geistlick unde wartlick wor desße hanntschrifft mochte vorkamen, horennde unde leßende dath ick dem erßamen Brun Oldenborch, Johan Belinck, Oltman Ickenn, Hermen Middendorp, Johan Ellebracht, dat ick ße hebbe laven heten, als van minenthwegen des unfals halven, van Korth Hemelinck des slandes halven vor anderhalff C Bremer marck, unde twintich daler, welcker I ½ halff[!] thunderth marck scholenn hebben Corth Hemelinng ßine erven, unde de twintich dalers schal hebben de fageth Oleff ßinckeler in Hitlannth. Des hebbe ick dith ßo vorwilligeth, al min guth bewechlick unde unbewechlick, buten Bremen unde binnen Bremen, ßunder jenige behelp edder argelist hebbe ick em al dath min is freig gegeven hen tho nemen, beth dath ick ßodane vornogeth hebbe tho ein underpande hus unde boedem, dar to hebbe ick eme gelaveth bi minen truwen eren, dath ick nicht wil uth dem schepe schedenn, welcker mi mith in Dudeschelannth voreth. Ick hebbe eme tho voren einen iderenn van dusßen vorbenompthen mennen einen schadeloßenn borgenn geßetteth, dar ße mede ffredelick sinth, dith ßo fast tho merrer warheith. Hebben hir mede an unde aver geweßen de dith mede behoreth hebbenn, dath ick dith ßo fast wil holdenn als de schipper Segebade Detteckenn unde al ßin folck, Berent Felthußen, Johann Hagen, Corth van Baelenn, Rolleff ßegelcken, Johan Hackman, Hinrick Blome, unde de schipper Johan Ellebracht unde al ßin folck, nomlig Luder Brummer, Johan Schulle, Reinecke Binneman, Arp Bicker, Luder Teieman, Hinrick Hoeggers, Hermen Lunsman, Corth van der Heide, Johan Wulfffers, Johan Buckhorenn, Clauwes Nagel, Hinrick Brummer, Hinrick Oldenborch, Peter Grale, Dirick Luße. Des hebbe ick Gerth Brecker alle dusße vorbenomptenn menne gebedenn und mine hanth gedan unde geßecht, ick bidde juw alle umme gades willenn, wilth dith mede betugenn, wo vor geschreven is dath ith ßo war is unde dath de lude uth minen noden gereddeth hebben unde dath ße ßunder schadenn ßin unde ick ße erlickenn wil benemenn unde wil dith ock alßo faste holdenn, sunder jenige behelp unnde arglist. Des thor warheith hebbe ick min gewonthlick marck mith miner egenn hanth hir under geßetteth, unde geschreven nha Christi unßes heren geborth dußenth viff hunderth unde soven vofftich jar.

Gert Brecker, bekenne dith alles vorgeschreven.