Duplica et conclusio Dirickes van Mynden anwaldes Gerth Brekers contra Johan Belyng, Brun Oldenborch et consortes clegeren.

Erbaren wolwisen gebedenden heren, wes am jungsten Dyrick Wyttynck, anwalt Johan Belynges, Brun Oldenborges at litis consortium der clagenden replicando vorgebracht,¹ jegens my Dyrick van Mynden, anwalt des boclageden Gerth Brekers sette unde segge dar wedder yn stede mynes principalen duplicando, nachfolgenden yegenborycht.

Anfencklick neme anwalt vor bekant an, allenth wes bevoren yn unser exception schryfft gesettet unde van dem gegendele dar inne replicando, nycht wedderfechtet eyn ys, den dar mede tacite war tho synde bostediget, idth eyn kom ock nein mynthe de dar leveth myth guden grunde warmaken, dat myn principal Gerth Breker, Cordt Hemelinck zeligen der maten vorwundet heft, dat he dar van starven konde, den wes em dar na van dem anderen boyegenth etc. wo alrede bevoren in unser exception gemeldet,² de wy alhyr wedder umme gesettet unde repeteret wyllen hebben, unde ys unweddersprecklick wo vor hen angetagen, de warheyt, dat Korth Hemelynck selyger na dem erwassenen twyste unde slegen, alle synen vorigen handel, buthen unde bynnen schepes borde, na wo ock bevoren, in allermathen gedreven heft, dar na 10 oft 12 dagelanck, myth dem schepes kynderen, und vom dem he geslagen myth ohme gegeten unde gedruncken, sunder yenigen ovelmoth unde clagent, is leyder dar na de schypper unvorsendes an eynen morgen, alse he des voravendes ys tho bedde gegan, yn syner koien dodt gefunden, uth wat orsaken is gade dem almachtigen bewust, de wyle den gebedenden heren, dusse erwassene unval unde twist, wo vor hen gesettet, myth warheyt nycht anders syck erholt, is mynes des anwaldes ynstendige bede, unde flytige boger i. e. w. wyllen mynen principalen van der vorschryvinge unde van den thogesechten gelde, na vormoge des 101 yn den statutum absolveren unde de casseren ock erkennen, dat he nycht wider tho beterende schuldich den wunden offte slege, etc. wes overst bolangen doith, de vorgebrachten copien der missiven, so van mynen principalen geschreven etc. segge dar yegens anwalt nach dem de anderen mede hantdadygen, syck unde Alerth Wylkens so mede myth mynen principalen yn de heyde geroeken van der daeth affgetuget unde geswaren, is myn principal Gerth Breker, yn der heyde, yn dodes gefar stekende gebleven, de ehm unmogelick tho entflende, he en moste den uth frucht unde lyves gevar, myth synem wedderdel, yn eynen vordrach syck ynlathen, unde yn de nu vorgebrachten, unrechtmetigen vorschryvinge, der mathe bowyllen, wo myth wyderen yn unser vorrigen exception vorhalet, denstlyck byddende tho erkende , wo vorhen aldar gebeden, wyl ock anwalt hyr mede in den namen gades thom ordel besluten.

Dyrick van Mynden anwalth unde fulmechtiger Gerth Brekers.