Quadruplica et conclusio Dyrickes van Mynden, anwaldes Gerth Brekers des beklageden contra Johan Belyng, Brun Oldenborch et consortes.

Entlick tho sluten, grotgunstigen gebedenden heren, jegens de vorgebrachten triplicen,¹ Dyrick Wyttinges, anwaldes Brun Oldenborges, Johan Belynges et litis consortium, do yck Diryck van Mynden quadruplicando et concludendo folgenden jegen boricht.

Wes bolangen deith dat 101 in den statuten, vorhen van my Dyricke van Mynden angetagen etc. segge dar up anwalt oft gelyck dat sulvige aldar thor stede, dar syck de unlust thogedragen, nycht stede gehat, so ys doch boclageder unde de clagenden ock de parsone dar aver syck dusse unwylle thogedragen, samptlick dussem angetagenen statute underwurpen, der halven Gerth Hemelynges zelygen broder sampt synem thostande wedder recht mynen principalen Gerth Breker tho dussen unbyllyken vordrage, unde den nu gevorderden summen gedrungen hebben, dat he dar vor de nu clagenden parte heft uthsetten mothen tho borgen, ungeachtet dat nummer kan werden bowyset, dat Gerth Breker allene handtdadich yn dusser sake jegens der schypperen gewesen, den de anderen schepes kynderen mede, yn mate unde gestalt wo bevoren by unser exception gesettet, de yck anwalt in namen mynes principalen hyr wedderumme repeteret, unde tho lesende wyl habben gebeden, den myth warheit also, unde nycht anders, dusse twispaldung twisschen den schypperen unde den anderen gemeinen schepes kynderen ys entstan, dat se dar na myth unwarheit, sulvest mede hantdadich, up mynen principalen getuget hebben, yn synem affwesende yn der heyde, dar uth unvormitlich de nu boclagede gedrungen ys, allenthalven yn dodes geverlicheit stekende, den nu geforderden summen van syck tholavende, de em unmogelyck thobetalende, wen he gelyck vorkofte, allent wat he baven erden lyggen unde vorende heft, als den frouwe unde kynder gelyck bydden mosten, nychtes tho weiniger, hefft syck Gerth Hemelinck unde de nu clagende part, wedder umme vorspraken jegens mynen principalen, wen he dat thogesechte gelth entrychte, dat he als den bynnen unde buten Bremen, frye unde unbekummerth wanen, gan und stan schole, des syck myn principal also vorseen, der halven yn den nu geforderden summen, syck averreden lathen, welke nu vorgemelte thosage, mynen principalen nycht geholden warth, ock nycht van em geholden noch vor schaffet werden kan, unde yn der gestalt, myth twen geyselen geslagen wurde, myth vorwisynge dusser guden stadt, unde myth straffe unde vorlus alle syner goeder, dat yo unbyllick, unde dem rechten ungemeten ys, alles tho i. e. w. bodenkent gestelt, ith eyn heft ock rechtes halven myn principal, nene macht gehat, wyder syck tho vorschrivende, den up syn anpart gudes, dar van eyn parte syner eheliken husfrouwen, unde twe parte synen kynderen rechtes halven geboren, dar inne myn principal, eme tho nadel, nychtes syck vorschryven, noch handelen macht heft gehat, bydde tho erkennende, wo vor hen allenthalven gebeden etc. denstlick byddende i. e. w. wyllen mynen principalen boswerynge, ock syner armen frouwen unde kynderen gunstichlick betrachten.

Mith vorbeholt aller wyderen nottruft.