Replica necnon in eventum conclusio Johan Belinges Brun Oldenborges et consortium contra anwaldenn unnd procuratoren Gerdt Brekers.

Erbare vorsichtige grothgunstige unnd gebedende hernn. Nadem unnd dewill wy Johann Belingk, Brun Oldenborch sampt unse consorten erstlick up eyne uthgebrachte citation Gerdt Brekers myth eyner hantschrifft¹ so he uns ghegevenn vor unses g. h. gerichte ock folgendes vor i. erb. w. hebben boclageth, worjegenn he dann dorch synen fulmechtigen Dyderich vonn Mindenn eyne vermeinte exception schrifft² evergevenn lathenn, unnd off wy woll dorch unsenn procuratorn unse inrede mundtlich darjegenn doin willenn lathenn, welch uns dann nicht gestadeth dann schrifftlich unse nottrufft vorthobringenn von i. erb. w. gerichtlich uperlecht ys wordenn. Dem tho volge erschine wy, Johann Belingk unnd Brun upgemelt myth von wegen unnd in namen unser consorten vor i. erb. w. gehorsamlich unnd willenn nun de handtschrifft Gerdt Brekers so wy hirbovorns vorbracht unnd nun hirinvorliveth overghevenn vor unse klage libell gesettet unnd producert hebbenn, seggenn over jegenn de upgemelte vermeinte exception schrifft replicando wo volgeth.

Unnd erstlich off woll de boclagte anthundt wo sych de unwille tusschenn ome anderen schepes kinder(en) unnd den schippernn tho gedragen, seggenn dath solchs uns klegerenn nichts deith anfechtenn, wante wy darmith nichts tho doinde wente wy dar by ann unnd aver nicht gewesenn, unnd wes he ock vonn der underredunge so he mith Alert Wilckens geplegeth unnd dat he ock knobbekenn inn der heyde ghegetenn unnd dath ome unse vorgebrachte syne hantschrifft scholde inn synenn noden synn affgedrungenn, des hebbenn sich i. erb. w. uth synen des boclagtenn missivenn mith A, B, C signert anders tho berichtenn.

Unnd dewile dann hoichwise grothgunstige unnd gebedende hernn wy klegere dem boclagtenn inn tidt he synenn schipperenn unnd brotherenn umme gebracht unnd synn leventh aldar thor stede (wo wy nicht eynn christlick medelidenth mith ome gehadt unnd up synn bogerenn uns nicht vorborgen uthgestellet wedderumme lathenn unnd vorlesenn mothenn, unnd so he dann sine ehre na inholde syner vorschrivinge de he uns im bysynde voler erliger uprichtiger borger so dar inn vormeldet tho gestelleth nicht betrachtet dann gar in vorgethenn gestelleth) wy over mith rechte darjegenn up eyne citation so wy tegenn denn boclagten uthbracht bekamenn, dath wy na inholde syner vorschrivunge inn synn erve unnd gudt beß so lange wy der borgeschafft benamenn vhonn unsers g. ff. unnd h. hoichloveliger gedechtenisse sinth ingewiseth wordenn.

Nachdem rechtlevende hoichwise grothgunstige hernn i. erb. w. uth ingelachter hantschrifft ock denn missivenn des boclagtenn wy clegere tho dusser sachenn uns sulves nicht gedrungenn, darmith ock gar nichts tho doinde gehadt he ock uns noch frundt oder mage gewesenn, dann allens wes vonn uns geschenn, dar ome dat uth christlichenn medelidende in behoff syner unnd syner frowenn tho gude unnd thom bestenn is angewendeth, unnd haddenn uns nicht vorsehenn dat uns dar vor solche undanckbarheit scholde boyegent hebben, welch wy dem almechtigen wyllen doin bovelen.

Unnd biddenn wy clegere instendich unnd underdenichlichenn i. erb. w. dusse sachen gunstichlich tho gemothe vorenn unnd erwegenn wo unschuldich wy tho dusser geloffte gekamenn, unnd derwegenn i. erb. w. uns gelichsfals, wo vonn unses g.h. vagede uns boschehenn, inn de erve unnd gudere des boclagtenn beß wy der loffte unnd unses erledenen schaden na inholde syner vorschrivinge enthleddiget mith rechte inwisenn wilten. Unnd dat dusset sich tho rechte nicht anders will geboren, willen wy clegere im namen gades cum oblatione si quid facti slutende tho i. erb. w. richtliche erkentenisse gestellet hebbenn petentes nobis ius et iusticiam ministrari.

Aller richtlichen nottrufft vorbeholtlich.