Duplica et conclusio Gerdt Hemelinges contra Diderich vonn Mynden anwald Gerdt Brekers.

Wedder unnd jegenn de vermeinte replicen¹ Diderichs vonn Mynden anwaldenn Gerdt Brekers overgeve ick Gerdt Hemeling i. e. w. duplicando nachfolgende nottrufft, und sette unnd segge erstlich up denn punct de exception wedder der tuge uthsage bolangedt dat desulvige dorch vermeinte syn des producenten angeven nicht kan oder mach affgelevet oder vorworpenn werdenn, wyll nachmals myne vorige avergevene exception darjegenn repetert unnd erhalet hebbenn, woruth i. e. w. lichtlich thoersehende wo einhelich de tugen in orer uthsagen sinn oder nicht, dewill de overstritug und discordes bofundenn wercket ore uthsage tho rechte gar nichts will solchs tho erkentenisse des rechtenn gestellet hebbenn.

So vole nun de transaction bolanget darvon meldung geschen als scholde ick Gerdt Hemeling Gerdt Breker baven alle billicheit tho solcher transaction gefordert hebben, solchs werdt mith gespander warheit aver my erdichtet unnd geschrevenn, dann unweddersprechlich war kann ock imfall der nottruffyt dargedann unnd bowyseth werdenn idt mothenn ock de borgenn dat bokennenn, dat ick yn tyden de dotslach geschenn I weke sees myth mynen schepe vonn dar gelegenn bynn ock Breker nicht so na gewesenn dat ick eynn wordt mit ome geredet wo koinde ick dann ome tho solcher transaction nodigen off drengen, so wett he ock woll dat de borgen unnd nicht he myth my gehandelt dat he ock umme gades willenn itlige borgere in syner vorschrivunge de ick nochmals myth A und B vortekent² hirbivorwardt avergeve gebeden se solcher transaction ingedenck woldenn wesenn derwegen he desulvigenn tho holdende schuldich.

Unnd wor Breker des dotslages unschuldich were gewesenn scholde he sich des billich mit rechte wo de andern schepeskynder gedann untlecht hebbenn, dewill he over woll gewethenn he mynen zeligenn broder vom levende thom dode gebracht hefft he wikenn unnd folgendes gnade bogerenn mothen, unnd wor ick de scharpe des rechtenn mit ome hedde vorgenamen unnd mith klagen vor der overicheit were vortgefarenn, moste he siner vorwerkunge na darvor geleden hebbenn, welchs ick dann synen borgen up ore vorbede tho gude nagelaten, wo danckbarlich unnd erlich he onen des vorgeldet mit settunge der schadelosen borgeschafft ehr he uth dem schepe wolde varenn wo he solchs tho doinde, inn upgemeltenn vorschrivungenn belaveth, solchs will ick tho i. e. w. unnd eynes idern ehrlevendenn nachdenckes gestellet.

So vole nun de legitima unnd anthall der frouwen unnd kindere dat de transaction desulvigen nicht mochte preindiceren bolangedt, darjegenn segge ick Gerdt Hemeling dat allens wes Gerdt Breker sich vorschreven, dat sine husfrowe unnd kinder solchs tho holdende syn schuldich, dewill he tho reddunge synes levendes nicht allene dan siner frowen unnd kinderen solchs tho troste up dat se nicht widtwe unnd wesenn werdenn mochtenn mede gedann unnd angewendeth.

Wedder dat 101 allegerte statutum segge ick Gerdt Hemeling dat dat sulvige hir nicht stadt moge hebbenn, dewill dat sulvige vonn badtstavenn karcken unnd marckede alhir binnen deit melden, unnd dat des eme bosichtunge vormiddest dem ede moth ingetuget werdenn, dewill over dusse unfall unnd oveldaet in einem fromdenn koninckricke sich thogedragen modt billich na dem rechte so dar gebruchlich gerichtet unnd geordelt werdenn.

Up de bogerten moderation upgerichteder transaction unnd wes de certification des vagedes inn Hidtlandt³ bolangendt is darjegenn, geve ick Gerdt Hemeling den boschedt dat de certification unnd copie dersulvigenn in sich recht unnd uprichtich unnd werdt dardorch de schult unnd mißhandelung Gerdt Breckers genoch dargedan unnd erwesenn, dat ome eine moderation seiner verwerckunge na unnd darvor ghegevene vorschrivunge geschen scholde kann nicht billich mynes erachtens erachtet werdenn, bydde meher i. e. w. in recht spreken unnd erkennen wille he syne borgen tho bonemen unnd uth up angetagenen orsachen der transaction full tho doinde syn schuldich, unnd dat solchs billich unnd recht sy will ick tho i. e. w. richtlicher erkentenisse im namen gades concluderende gestellet hebbenn.

Salvo iurium suffragio.