Wy Jemeeß, hertzoch vonn Orckeney unnd Hidtlandt, grave Boidtwall, unnd her vann Cienthunn, Heliß, Liddißdall, unnd grote ammerall vann Schotlandt, ock einn ehelyker vortrurender gemaell, der koningynnenn M. Thunn wy hirmidt widtlick idermennichlich, dat wy sinn vorfellis unnd an gekahmenn, inn eine havenn gehetenn upt Neß inn Swineborchovet, inn Hidtlandt gelegenn, unnd hebbenn also itlyke unnser gescheffte halvenn, dorch schepe oder schepeßhandell, uth thorichtenn, derwegenn wy gebedenn unnd bogeret vann Gerdt Hemelingk (ein kopmann der stadt Bremenn) umme sinn schip, genohmet de Pellicaen, thokopenn, offte unnß tho thostaenn lahtenn, vor einenn gebohrlykenn und certeinenn penningk oder summa geldeß, he averst derwegenn uth frienn willen unngedwungener condition, sick mit unß vordragenn unnd geaccorderet, inn dusser gestaldt, wo folget, als nomplick, Gerdt Hemeling iß der sake halvenn, mit unnß enich unnd thofrede, dat wy synn schip wo vorgeschrevenn, schollenn hebbenn, mit sambt deß schepeß rathschup unnd all siner thobehoring, so he idt tho der tydt vorde, unnde nichteß darvann thonehmenn, unnde he unnß sine handtschrift darup gegevenn, inn vormeldunge, wo folget, eine tytlanck alß nomptlick twe maente, unnd de summa tho iderenn maente, vor dat schip, vofftich kronenn, soverne wy idt gebruickenn, inn unnsernn deinste, unnd so idt sick tho droge offte bogeve, dat dat vorgerohrde schip schadenn offte gebreck krege, inn densulvigenn unser vorwaltunge unnde deinste, odder wy idt ohne nicht wedder tho handenn steldenn, inn denn vorgeschrevenn twenn maentenn, vann dato dusseß bewyseß, so vorplichte wy unnß dem gedachtenn Gerdt Hemeling tho fredenn thostellenn unnd thobethalenn, ohme ofte sinenn ervenn edder erveßgenohtenn, vor dat schip einen summa geldeß, alß nomptlick twolff hundert daler, unnd vor ider daler twe unnd twintich schillingk Schottisch, gemeine unnd ganckbahr geldt dusseß rykeß, oick darbenevenn vor datt geschutte dat by dat schip iß, scholenn vor hundert kronenn de summenn offte de gewerde darvann dusser vorgeschrevenn contract unnd bewillinge, bolave wy by unnserenn lofflykenn ehrenn nha gebohr eineß forstenn, festichlick thoholden unnd nach thotrachtenn, inn vorsekeringe averst unnd tho tuegenn dusser vorschryvinge, hebbe wy unnd de vorgeschrevenn Gerdt Hemeling mit unnser handt hirunder getekent, geschenn inn der havenn genohmet upt Neß, inn Schwineborchovett, den voffreindenn augusti, nha der gebordt christi 1567, inn jedenwardicheidt unnd bywesennde Dyrick Meyer, Jone Andresun inn Pattinwehme, Tohmes Martenß inn Carreill, David Hawsenn inn Anstrucht, Hinrick Schmit inn Brack, oick ithlyke mehr etc.