Friderich der ander von Gotts gnaden zu Dennemarcken, Norwegen, der Wenden und Gotten khoning, herzog zu Schleßwig, Helsteinn, Stormarnn, und der Dithmarschen, graff zu oldennburg und Delmenhorst.

Unnsern gnedigstenn willenn zuvor, ersame liebenn besonndernn. Unns ist euer vorbittlichen schreibenn¹ vor euerm mittburgernn Gertt Hemeling, seins durch denn Schottischenn hernn vonn Bodevall abgehandeltenn oder genhommenen schiffs halber, daß wir ihme wider denselbenn zu dessenn restitution oder erstattung gnedigst verholffen sein wolttenn, vor weinig tagenn woll zu handen gebrachtt, das wir seines inhaldts sambt erwhenntes supplicantenn bittschrifft² gnedigst horenn lesenn. Wollen euch daruff zu gnedigster andtwortt hinwider unverhalttenn seinn lassenn, daß wir unns euer durch verruckter zeitt euer ann unns abgefertigtenn gesanndtenn dieser sachenn halber beschehenn suchung unnd unnsers daruff daß mhall gegebenen gnedigsten bescheidts gutter massenn woll zuerinnern, unnd wie wir unns domalnn auch vernhemenn lassenn, mochtenn wir denn eurenn, die ahnn solchenn schiff intereße habenn gnedigst woll gunnen, daß sie vonn gedachtenn aus Schottlanndt entwichenenn hernn, mitt entwendung desselbenn verschonnt bliebenn, unnd deß ihrenn ungehindertt hettenn geniessenn mogenn. Unnd weill wir gnedigst geneigt in unser jurisdiction unnd bottmessigkeit einem jedenn in seinen furderungenn so weit er derenn befugtt geburlichs rechtenns verhelffenn zulassenn, habenn wir auch keinn bedencken, den euren die gedachtenn vonn Bodevall warumb zubeffrechenn austreglichs rechtenns wider ine zugestattenn, darbei wir eme denn seine rechtliche notturfft, wie ihr tzuermessenn, auch nicht abtzuscheidenn. Do nhun jemandts der eurenn derhalber bei unns ansuchenn und die sachenn nach unnsers reichs ublichen lanndtrechten furdernn wirdt, wollenn wir unns inn allem waß uns desfals tzuthuen gebuertt, dermassenn mitt quadenn gegenn sie zuertzeigenn wissenn, daß sie sich geweigertenn oder vertzogenenn rechtenns nicht sollen zubeclagenn habenn. Welchs den auch umb soviell fuglicher zugeschehenn, weil gedachter vonn Bodevall uff beschehen ansuchenn der kon. m., unsers freundtlichen lieben ohmen unnd brunders, wie auch des regentenn unnd etzlicher stende inn Schottlanndt, inn unnser custodienn und verhafftung nochmalnn wirdt enthaltten, und die sachenn derhalber er tzu rede gesetztt, irer gelegennheitt halber, villicht nicht so gar schlennig ire endtschafft erreichenn mochtenn. Sunst habt ir unnser unnd der unnsern gerechtigkeitt ahnn denn jennigenn waß in der eroberung bei ihme alß einer fluchtigenn und verdechtigenn personn erlangt, unerinnert vor euch selbst unnderthenigst zuermessenn, die wir unns denn hiermit auch gnedigst vorbehalttenn. Welchs wir euch auff angeregtt euer schreibenn gnedigst nichtt wollenn verhalttenn, unnd seindt euch mitt gnedigstenn willenn woll gewogenn. Datum uff unnsern schloß Friderichsburg, denn 10 aprilis, anno etc. im 68en.

Friderich.