Artickell der clacht, alls Otto Stigissen ambtmann up Islanndt, wedder de Dudeschen koplude in Islannde hanterende, over gevenn etc.

Nachvolgende artickell hefft Otto Stigissen ambtmann up Isslandt gegen de Dutzscken koplude, so ehre kopmanschop unde hantirunge up Islandt gebrucken, tho clagende.

Erstliken so understaen sick etlicke dersulven de Englischenn schepe uth den haven thodrivende, ungeacht dath solchs by vorlust schip und gudes inn rechten verboden. Ock is dathsulve kon. m. unde dem lande nadeelich, idt hefft ock Lutke Schmedt inn der haffe Borsann solcken gewalt geevet, und noch wedder recht lyck oder wandel darvor gedaen.

Thom andernn, so affmercken etlicke Ißlendischenn buren ehren fisck, also dath se den nemands anderß vorkopenn mothen. Dath alles dem landtrechtenn entjegenn.

Thom drudden so foren se tenn dele fredlose lude uth, de ore broke nicht gegeven, noch vele weiniger geleide kregenn, unde de jenigen so solckes dohenn sind na landrechte sulvest fredeloß, und hebben schyp und guth an kon. matt. vorbraken.

Thom veerden so nehmen e[...]¹ kels, konings broke unnd gelt up, van den Ißlendernn und andern, unnd wen se sick sulvesten under einander schlaen, wollen se den vaget van kon. matt. wegenn we sick na dem landrecht egennt unde geboret, nene broke geven.

Thom vofften fangen etlicke, de Ißlendischen papenn unde buren, unde bynden se ahn ohre ancker, und schatten ehnen ohre fisck unde guth aff, na ohrem sulvest gefallen, mit grothen unbillicheith, kon. matt. hocheit unde dem rechten tho weddern.

Thom sosten so lathenn etlicke ohre bothe und volck thojegenn denn landrechtenn thor seewartz gahen na ohrem eigen gefallenn.

Thom sovenden, so hefft schipper Hanns Huge einenn burenn inn Ißlanndt dortich wete fysck, twolff sckape und twee ochssen affgeschattet wedder recht, und kon. mt. bevehlhebberen dar nichts vor geven. De bure het Jhon Jonssenn tho Wellmu[?].

Thom achten, so hebbenn se vor westen inn Ißlanndt grothe gewicht, dar se denn fisck mede inwegen, unde de Ißlender mogen mit ohrenn eigen gewichte wen se kopmanschop gebrucken nicht wegen, dath doch dem landrechte, und der kopmans eigen bewilligunge tho weddern, den de kopman is schuldich Ißlandisch gewicht thobrukende.

Thom negenden so foren se inn Islandt kleine achtendeell veertel und tonnen da se bottern, honnig und teer inne verkopen, des kopmans eigen bewilligunge, uth bygelechtenn breve unde segellnn thobefindenn tho weddern, und soldenn na Ißlendischem landrechte all ohr guth dath se vorhandellt darmede dem konige verbrakenn hebbenn.

Und bidde hirup kon. mt. verordenthenn rede willenn hirinn by denn vann Hamborch de billigkeit vorfugenn unde verfordern, dath de kopmann, de der segellatz up Ißlandt gebruken will, underricht, sick fredlick unde wo recht unde billigk, up kon. mt. lande mit handell unde wandell tho holden, dath ock de nastellige unde enthwante breke unde wes den luden affgeschattet, wo billich, wedder gegeven werden moge.