INSTRUCTIO waß an den durchleuchtigsten großmechtigsten fursten und hern, hern Christian dem vierten zu Dennemarcken, Norwegen der Wenden undtt Gotten kuningen hertzogen zu Schlesewigk Holstein Stormaren und der Dittmarschen, graven zu Oldenburg und Delmenhorst. Unser des raths zu Bremenn secretario Daniel Bisterfeldenn, zu werbenn befohlenn unnd auferlegtt.

Anfenglich soll ihr kun. maytt. unser secretarius negest geburlicher dancksagung gnedigst verstatteter audientz unsere underthenigste unnd gantzwilligste dienste bestes fleißes vermeldenn und donebenn ihr kun. maytt. underthenigst erinnerenn, welcher gestaltt ihr kun. maytt. unnd deroselbenn hochstlobliche vorfarenn kunige der reiche Dennemarckenn gnedigste zuneigung unnd wolgewogenheytt, gegenn unß diese gute stadt unnd gemeine burgerschafft wir je und allewege underthenigst gespuret unnd befundenn, auch in sonderheit mitt indeme, das vonn ihr kun. maytt. unserenn burgerenn von vielen und langenn jarenn hero nicht alleinn gnedigst concediret vergunnet unnd zugelaßenn wordenn, etzliche havinge inn ihr kun. maytt. lande Ißland mit ihrenn wahrenn zubesuchenn unndt mitt denn einwonerenn derselbigenn landen ihre gewerbe commercia hantierungk unnd kaufmanschafft zu exerciren unnd zugebrauchenn, sonderenn das auch ihr kunig. maytt., derenn etzlichenn auf sonderbare havinge kunnigliche begnadung unnd paßbrieve gnedigst gegebenn unnd zukommen laßen hettenn, inmaßenn dan auch ihr kun. maytt. noch verschienenn neun und achtzigstenn jares etzliche unsere burgere auf unterschiedliche havinge, mit newen concession unnd paßbrievenn, alß Martenn Losekannen, auff Oistfort in Oistfortsußell,¹ Johann Hudemann auf Bodenstede in Schnevelß sußell Carstenn Bake auf den Holm, unnd Johann Schroder auf die havinge Wattloße gnedigst versehenn unnd begnadett,² deßenn dann ihr kun. maytt., wir unnd unser burgerschafft in schuldiger underthenigkeyt unß bedanckenn mustenn.

Unnd obwoll folgendeß sich dabey begeben unnd zugetragenn, das ihr kun. maytt. an unß unterem dato denn 30ten januarii dieses nochlauffendenn neuntzigstenn jares gnedigst gelangen laßen, weiln bey jungst erhaltenen newenn kuniglichen concession unnd paßbrieven, einer erwenter unserer burger Martenn Losekann genand, auf die havinge Wapenfoirt, in abwesenn etzlicher ihr kun. maytt. cantzley verwandten, denen die gelegenheytt bewust, kunigliche begnadung erlangtt hette, unnd aber sich nachmalenn befundenn das nicht er, sonderenn ein burger e. kun. maytt. stad Hamburg, Daniel Elers dieselbige zuvor besiegelt hette,³ das demnach unser burger sich solche havinge zubesiegelen endhaltenn unnd auf die havinge, darauf er zuvor kunigliche begnadung erlangt, weder newe concession unnd paß underthenigst anhaltenn muchtte.

Das jedoch, kegenn, ihr kun. maytt. sobaldt deroselbigenn schreybenn, (welchs wir mit geburlicher underthenigster reverentz empfangenn) unß zugekommen, wir unß dahinn underthenigst erkleret, obwoll zuerst in denn, ermeltem unseren burger auf unsere underthenigste intercession unnd fürbitschrifft, gnedigst mitgetheyltenn concession unnd paßbrieff, für daß wortt Oistfortt, Wapenfoirt, auß einem mißverstande gesetzett gewesenn, das jedoch solcher error wie vonn den unserenn derselbe etzlichen ihr kun. maytt. cantzleyverwanten gezeigt unnd dabey vorige vonn der kun. maytt. herrenn vatterß weyland kuning Freiderich hochst unnd christmiltister gedachtnuße, ihnen gnedigst mitgetheylte concession unnd paßbrieve, darinne Oistfortt in Oistfort sußell specificirt befundenn aufgelegtt hinwiederumb geendertt worden, unnd demnach das solcher error auch inn e. kun. maytt. registerenn uber die havinge in Ißland gleichfals geendertt, unnd unsere arme burger bey der havinge Oistfortt in Oistfort sußell, alß die er hiebevor auff kunigliche concession unnd begnadung viele lange jar hero besiegeltt erhalten werdenn muchte underthenigst gesuchtt, deßenn bette wir underthenigst wolte sich ihr kun. maytt. auß ermeltem unserenn sub dato denn 28ten februarii anno 90,⁴ an ihr kun. maytt. ergangenem schreibende gnedigst wiederumb erinneren lassen.

Nachdem aber gnedigster kuning daßmalen ihr kun. maytt. und deren furtreffendliche räthe mit anderen kuniglichenn hochwichtigenn gescheffen beladenn gewesenn und auch dabey eingefallenn das die kunig maytt. auß Schottlandt, alß auch der hertzog vonn Braunschwug unnd andere furstenn und herrenn, bey ihr kun. maytt. angelangett dahero dann verpliebenn daß der zeytt ihr kun. maytt. resolution auf unser undertheniges schreibent nicht erfolgett, unnd wir eß dann nebenß ermeltenn unserenn burgeren dohin geachtett daß unser unnd ihre geburnuße seinn woltte, dieß werck nicht alleinn e. kun. maytt. underthenigst wie darumb zuerinnerenn,⁵ sonderenn auch e. k. maytt. genugsam beyzubringenn, das auff e. kun. maytt. hochloblichste vorfarenn des reichs Dennemarckenn gnedigste bewilligung, sie (unsere burgere) gegen erlegung der geburnuß an zoll unnd anderer recognition unnd ungelte, vor vielenn undencklichenn jarenn hero, die havinge Oistfortt in Oistfortt sußell mitt ihrenn unstraffbarenn wahrenn zu notrufftigenn underhalt unnd besonderen frommen unnd bestenn, ihr kun. maytt. unterthonenn daselbst jerlichs besuchtt unnd ihren handell unnd wandell alda gehabtt, alß habenn sie uber die vorige vonn hochstgemelter ihr kun. maytt. herrenn vatters christmiltister gedechtnus underthenigst erhaltene, unnd außgebrachtte paßbrieve, auch gennugsamen schein und beweiß, vonn denn furnembstenn ihr kun. maytt. underthanen und einwoneren der havinge Oistfortt in Oistfort sußell erlangt das nemblich sie unnd ihre vorfaren nicht alleinn auff kuninglich concession unnd begnadunge, vor vielen und uber die achtzig jarhero solche havinge mitt ihren gutenn und unstraffbaren waren besuchtt unnd ihre kaufmanßheuser und bodenn doselbst bey der ladelstede, Fulwick genand aufgeschlagenn gehabtt unnd noch habenn, sonderenn auch dermaßenn woll und stedlich mit ihnen gehandeltt und solche wahre zugefurett das sie gantzwoll damit friedlich, auch fur anderenn ihre handtierunge mitt ihnen hinfuro zutreybenn begerenn, unnd ihr kun. maytt. sie dabey gnedigst zubeschutzenn, underthenigst bittenn, zuvorab weyll gemelte unsere burgere e. kun. maytt. untherthonenn, auch diesen vorteill erzeigenn, das sie sonderliche kleine schiffe, auff ihre unkostenn zurichten und machen lassen damitt sie uber etzliche meyle, den visch unnd andere wahre vonn ihr. kun. maytt. underthonenn, denn sie (die Ißlander) sunstenn uberland an die havinge bringen mustenn, selbst holenn und ihnen andere wahre umb denn kauff alß sie die bey der havinge gegebenn wieder anschlahen, in maßenn e. kun. maytt., auß denn originalen solcher hiebeyverwaretenn zeugnuße gnedigst ersehenn,⁶ und deßen weyterenn umbstendlichenn berichtt, vonn unserenn dießfalß abgeordentem secretario Daniel Bisterfeldenn, da eß ihr kun. maytt. die notrufft zu seinde erachtett, vernemmen konnen.

Wann wir dan nun darauf der underthenigstenn trostlichstenn hofnunge seinn ihr kun. maytt., unß, sowoll alß derenn hochloblichste vorfarenn, kuninge der reiche Dennemarcken, mit kuniglichen gnadenn, unß und gemeiner unser stadt unnd burgerschafft gnedigst gewogen seinn, und demnach unsere arme burgere bey denn ihnenn gnedigst mitgetheylten concession unnd paßbrievenn unnd darauff gehabtenn handell unnd wandell erhaltenn unnd dieselbenn gnedigst erweterenn, so betenn ihr kun. maytt. wir nochmalenn underthenigst ihr kun. maytt., gnedigst geruhenn, die gnedigste anordenung thuen zulaßenn, daß nicht allein der name Wapenfoirt, inn ihr kun. maytt. registerenn, uber die lande Ißland in daß wortlein Oistfort geendertt, sonderenn auch berurte e. kun. maytt. den unserenn gnedigst mitgetheylte concession unnd paß hinwiederumb von newenn umbgeschrieben und dabey auch die gewonliche ladelstede, welche, Fulwick genand wird gesetzett unnd also hinfuro allem zweiffell furgebawett und die unsere also bey solcher havinge unnd daselbst gehabttem handell unnd wandell gnedigst beschutzett auch die noch uberigenn zwey jahr auff funff, (inn erwegung der herlichen und gutenn zeugnuß so unsere burgere von ehr. kun. maytt. unterthonen ihres handelß und wandelß halbenn habenn) prolongiret unnd hinauß gesetzett werden muegenn.

Unnd alß auch bey erwenter havinge Oistfortt in Oistfort sußell noch eine andere geringe zeytt havinge Klaveßoe in Lön, genand gelegenn, so hiebevor vonn niemandt besiegeltt gewesenn alleinn daß ihr. kun. maytt. der ortherr eingeseßene unterthann, vonn unserenn burgerenn so die havinge Oistfort, besiegelt ihre notrufft ann mell bier und andere wahr, kegenn ihrenn mit großenn beschwer uber land gebrachtenn visch, unnd dan nun einer unser burger Friederich Tilbar genand solche havinge mit seinem schiffe ihr kun. maytt. underthanen selbst mit zum bestenn, damit dieselbige ihre wahre nicht so weytt uber land bringenn unndt ihre notrufft wieder abholenn durffen, da eß ihme vonn ihr. kun. maytt. gnedigst vergunnett unnd zugelaßenn worde zubesiegelenn unnd ihr. kun. maytt. underthanenn mitt aller notrufft unnd unstraffbarenn wahrenn zubesorgenn auch denn geburlichenn zoll und andere recognition dafur zuerlegenn, underthenigst willig unnd urbuttig.

Alß bittenn wir gleichfalß hiemit underthenigst e. kun. maytt. gnedigst geruhenn obbenantenn unserenn burger Friederichen Tilebar auf solche havinge gnedigste concession unnd paßbrieve etwann auf einn jar funff oder sechs welchs wir doch zu ihr kun. maytt. gnedigst bedenckenn gestellet seinn laßenn, in gnadenn mitzutheilenn.

Deßenn unnd aller kuniglichen gnadenn thetenn, zu ihr kun. maytt. wir unß underthenigst getrostenn, unnd werennß umb dieselb, die wir dem gnadenreichenn schutz gotteß deß allerhogstenn, zu allem kuniglichem wolstande friedfertiger regierung unnd frolicher leybeß gesundheytt, gantz getrewlich empfelendenn nach muchlicheytt under[de]nig[st] zuverdienenn willig unnd urbuttig. Datum? deßenn zuurkund habenn wir burgermeister unnd rath obbemeltt unser stadt secret hieuntenn aufs spatium wißendtlichenn laßenn truckenn, nach christi geburtt im funffzehenn hundertt unndt neuntzigstenn jare denn viertzehendenn tag des monats octobris.