Wyr burgermeistere und rath der stadtt Bremen bekennen unnd bezeugenn offendlich vor idermenniglichenn in krafft dieses brieves, das vor unß auff erfurderens Martenn Losekannenn unsers burgers personlich erschienenn sein, Jost Brockmann ungeferlich wie er berichtett unnd andere alte personenn ihnen nachrechnen konnenn ann die funf unnd neuntzig jahr alltt, Berend Losekanne an die achtzig jar alt, Christoffer Meiger einn man vonn siebentzig jahrenn, unnd Luder Wedemann auch uber siebentzig jahr altt, alle unsere burgere unnd vonn jugende auf gewesene sehefarene leutte, unnd habenn die beydenn erstenn dieweiln dieselb wegenn ihres hohenn alterß mit dem leiblichenn eide verschonett an eideß städt, die anderen letzsten beydenn aber mitt ihrenn aufgerichtedenn leiblichenn fingeren gestabteß eideß unvergebenn zu gott unnd seinem heiligenn evangelio schwerende, nach ein ander bezeugett bekennet unnd wahrgesagt, unnd erstlich Jost Brochmann das er vast vor die achtzig jahr auff eine havinge vor ostenn erlegenn so mann der zeytt Oistfoyrtt in Oistforttsußell genennet van Bremenn ab vor einenn buchsenschutzenn gesiegeltt, Berend Losekanne aber berichtett das er nun vor die sechtzig jahre, vor einenn boßmann folgendes fur einenn schiffer unnd kaufman, unnd Christoffer Meiger an die drey unnd funfzig jahr fur einenn balbierer unnd nachmalenn fur einen kauffman deßgleichenn auch Luder Wedemann das er dorther, leng dann fur sechs unnd funfzig jahren vonn Bremenn ab gesiegeltt, unndt daßmalenn die havinge welche sie mitt ihrenn schiffe besucht Oistfoirtt inn Oistforttsußell wie auch noch genennet daselbst ihr heuser unnd bodenn darinnen sie allerhand wahre zukauffe gehabtt aufgeschlagenn, und also auf kuniglicher concession unnd begnadung auch erlegung ihres geburlichenn zollens mit denn einwonerenn an berurter havinge ihrenn aufrichtigenn handell unnd wandell zu großenn der leute vorteyll getriebenn unnd gefurett. Wann dan nun dieses alles inmaßen obstehett also vor unß geschehenn unnd ergangen, unnd wir unß dann der warheytt zeugnuß zugebenn sonderlich so wir darumb ersuchtt unnd angelangett werdenn, unß schuldig erkennenn, alß certificiren unnd verificiren wyr hievonn unndt in macht dieses briefs, mitt underthenigster undertheniger [!] dienst unnd fleißiger bitte gemeltenn unserenn burger Martenn Losekannen solcher glaubwirdigenn zeugnuß unnd kundschafft fruchtbarlich genießenn zulaßenn unnd bey angereigter havinge so er unnd seine vorfarenn auf kunigliche begnadung nun so lange jahr besiegelt gnediglich zuschutzenn unnd zu handhabenn das gestrostenn [!] wir unß underthenigst unnd dienstlich unnd sein eß hinwiederumb underthenigst unnd dienstlich nach aller muglicheytt zuverdienenn unnd zubeschuldenn, urbuttig, unnd deßen inn urkund habenn wyr burgermeistere unnd rath obbemelt unser stadt secret hirunter aufs spatium wißendlich laßen truckenn nach christi unsers liebenn herrenn unnd heilandeß geburtt im funftzehenhundert ein und neunzigstenn jahre denn dritten tag deß monats decembris.