Im sakenn schipper Berndt Lösekannen, clegern, unde der anderen frunde, beklagedenn, einß unde ande[r]ß deils, heft ein ehrbar radth, weß van wegenn der jungst af gesprakenen sententien,¹ tho beiden sydenn in unde vör gebracht, an gehöret unde bewagenn, unde leth idt nochmahlß by densulfstenn in desser saken gesprakenen ordelenn, berouwen, dewyle averst derwegenn erkleringe gebedenn. Alß gifft de ehrbar rahdt darup denn bescheidt, dat sick de schipper Berndt Lösekanne der haven, der matschuppie thom vorfange, alß ock der lude, by denen öhre schulte uthstendich, nicht undermahtenn schöle, sunst stah öhme das landt (alß ein frey landt) thogebrukenn frey, unde ist darup de schipper der marschup alleß datt jenige, weß by öhme der marschuppie thobehörich, noch vorhandenn, luth der vörigen bescheide, ahne middel unde vorhenderinge wedderumme tho kahmen unde folgen tholathen schuldich, van rechteß wegenn, actum den 28en martii anno etc. 78.

Bartoldus Börneke subßch.